平遊深水埗 (二) • $65嘆盡3間隱藏風味小食

平遊深水埗 (二) • $65嘆盡3間隱藏風味小食

相關信用卡:

平遊深水埗 (二) • $65嘆盡3間隱藏風味小食

發表日期: 2016 年 12 月 20 日 更新日期: 2016 年 12 月 20 日 飲食

作者:Stella Yeung

上一集深水埗掃街就搵咗兩間米芝蓮嘅小食推介啦!今集就同大家食啲特別但又唔係周圍都有得食嘅小食喇,好似啖啖肉嘅雞捲、人人啱食嘅老鼠粉、同埋一間原身係中醫館嘅地道特色甜品鋪。

睇返啲相已經好肚餓啦,大家記得唔好空肚睇我嘅Blog呀!哈哈

馬來西亞老鼠粉 -  蘇媽.蘇媽馬來西亞美食店

地址:深水埗桂林街143號地下F3號舖

食物:招牌老鼠粉(細) $20

個人評分 :  ★★★☆ ☆  (5星滿分)

▲狗仔粉大家就聽過,但老鼠粉大家應該好少聽!其實老鼠粉唔係老鼠做嘅,只係喺馬來西亞嘅一個稱號,老鼠粉嘅麵其實就等於香港嘅銀針粉!而蘇媽嘅老鼠粉有帶甜黑醬油、豬肉碎、蔥花、同少少臘腸!而依個老鼠粉唔係湯粉而係撈粉,將全碗粉撈均嚟食甜甜地唔會太咸幾惹味㗎!


啖啖肉無骨雞卷 -  有一腿真功夫雞腿捲

地址:深水埗荔枝角道333號地舖

食物:原味雞腿捲 $20

個人評分 :  ★★★★★  (5星滿分)

▲講到雞卷依間真功夫雞腿捲真係做到好出色,整隻雞捲完全無骨,仲要即叫即整,雞捲外層係超香脆嘅雞皮,薄薄地唔會覺得好肥膩,而入面嘅雞肉超有肉汁同嫩滑。其實我之前係天后都有食過,但個間分店無咗所以今次真心要推介比大家!價錢係貴咗少少,但真係好好好好食㗎!除咗原味之外佢地另外仲有九種味道可以選擇,滿足晒你地貪心嘅慾望啦!


平價超好味糖水 -  康瑞甜品

地址:深水埗荔枝角道323號地舖

食物:特式仙草配芋圓 $25 、暖胃姜汁配小丸子 $25

個人評分 :

特式仙草配芋圓      ★★★★★  (5星滿分)

暖胃姜汁配小丸子   ★★★★★  (5星滿分)


▲依碗特式仙草佢另外可以揀一個配料,有芋圓、地瓜圓、小丸子可以選擇,我就揀咗佢地最出名嘅芋圓,糖水超足料有紅豆、珍珠、西米、薏米、仙草、芋圓,配料十足,而且味道清甜,口感夠晒豐富,真係食到停唔到口呀!

▲另外老闆私人推介咗依個姜汁糖水俾我,老闆話佢地嘅姜汁係真真正正自已餚出嚟,而唔係用普通姜精整嘅,所以一定夠晒姜,試完之後真係感覺到餚出嚟嘅姜汁係辣得嚟唔會甜,又抵食又好味,冬天暖胃必點之選呀!