平價酒店巡禮－石垣島 (二)

去石垣島玩，通常都會去埋附近離島玩，例如西表島、竹富島、波照間島、小浜島等等。喺西表島都係以水上活動為主，游下水、釣魚、浮下潛、扒下獨木舟、夜晚睇下星之類。呢次我就去咗西表島，島上面有民宿有Resort，我就揀咗一間平平哋嘅住咗一晚。

 

今次我住villa西表 (ヴィラ西表)，規模近似民宿，佢有雙人房、三人房、家庭房等唔同房型，一間房最多可以住6個人。
 

今次租嘅係新起嘅eco villa，有5間房，每間最多住3人。我住由左至右數第四間，最右邊嗰間似乎面積細啲。

 

酒店設施 / 服務
房內網絡：Wi-Fi (eco villa不設Wi-Fi)
早餐：免費
洗衣機：有
單車：日租500至1,500日圓

地址：〒907-1541 沖縄県八重山郡竹富町上原661

 

位置及交通

由上原港碼頭行400米去到Villa西表，附近有一間超級市場，可以補給。附近有沙灘，大約行200米就到，夜晚可以去睇星。記住由石垣島搭船去係去上原港，唔好搭咗去大原港。
 

eco villa同主館大約相距100米。
 

我喺日本樂天訂，佢有一個我喺日本樂天訂，星期日入住eco villa一晚，佢有個「將空房盡量租出」Plan (【空き部屋売り尽くし】超安現金特価！支配人きまぐれプラン（朝食付き）)，包免費早餐連稅3,900日圓 (約$273) 一晚。不過要留意，Villa西表唔收信用卡，預訂完去到要俾現金。喺Jalan網上訂房有部份Plan可以網上簽卡付款，但呢個平Plan就唔得。

 

房間設施

房間大約20平方米大，我住嗰間係半日半西式設計，冇床要鋪床墊，冇櫈要坐地下，但地下唔係疊蓆 (Tatami) 係硬地板，個Cushion又薄，坐得耐其實都幾辛苦。
 

室內有鋅盆、電熱水壺同雪櫃，但冇煮食工具，唔可以煮食。
 

門口左邊可以放行李喼同掛衫，雪櫃上面有插蘇，插住風筒對住呢塊鏡遠距離吹頭。
 

趟門出面有吊床。
 

基本有兩套床鋪被褥，不過我訂房時係訂單人，枕頭只得一個。
 

床墊攤開一個人瞓剛剛好。
 

洗手間同浴室係分開，留意洗手間冇洗手盆，要喺鋅盆洗手。廁所冇電子廁板，沖涼熱水係電熱水爐供應。
 

主要嗰盞燈可以校光暗同色調。

 

免費早餐

免費早餐有西式同日式，隔日轉款，我嗰日食嘅係日式，都幾豐富，主食有一整條細細嘅蒸魚、蛋、一小撮冷麵、三片魚生、一粒燒賣。另外仲有前菜、水雲/海蘊、番茄蛋絲白飯、薯仔、布甸/羊羹、菠蘿仔、麵豉湯同冰茶。

 

付費午 / 晚餐
villa西表有唔同價位嘅午 / 晚餐供應，散叫由1,800日圓起，愈貴自然愈豐富。住宿Plan亦有包埋晚餐，價錢平過散叫，例如eco villa包1,800日圓晚餐一份 (6款選1款)，日本樂天同Jalan單人最平連稅4,900日圓 (約$343)，平咗700日圓；雙人7,800日圓 (約$546)，平均每人3,900日圓 (約$273)。
 

本來我冇預到喺villa西表食晚飯，不過後來發覺附近步行距離內冇乜選擇 (真係冇乜餐廳)，最後都係幫襯佢。我叫咗1,800日圓嘅「近海魚の漬け丼御膳」，魚生雖然唔係特別肥美，但係新鮮，如果係連Plan買就更抵啦。
 

附送菠蘿仔，西表島盛產菠蘿，清香鮮甜，必試。出去玩時不妨留意下路邊嘅無人自助生果檔，每個由50至500日圓不等，視乎大細。
 

主館入面餐廳環境，早午晚餐都可以喺度搞掂，注意入餐廳係需要除鞋。

價錢比較
官網價：
「將空房盡量租出」單人由3,900日圓 (約$273) 起 (至5月31日)
「將空房盡量租出」雙人由7,800日圓 (約$546) 起 (至5月31日)
「包1,800日圓晚餐」(2選1) 每晚連稅單人由5,900日圓 (約$413) 起
「包1,800日圓晚餐」(2選1) 每晚連稅雙人由9,800日圓 (約$686) 起
匯價以100日圓=$7計算

喺Agoda、Expedia、Hotels.com都搵唔到villa西表，喺日本樂天同Jalan就搵得到。佢有好多唔同種類嘅Plan，淨房、包晚餐、戶外活動半價，如果大家諗住玩獨木舟、浮潛、晚間探險等等，可以睇下再決定。
最平嘅「將空房盡量租出」優惠期至到5月31日，而另一個Plan價錢一樣係3,900日圓 (約$273)，入住期至到6月20號，但只限單人入住。
「包1,800日圓晚餐」有兩種，一種係有6個餐可以揀，另一種就有2個餐可以揀，前者平啲。

 

訂房用咩卡？
雖然eco villa嗰啲Plan好多都要現場畀現金，不過喺Jalan有啲Plan都可以網上訂房簽卡，例如其中一個單人6,900日圓 (約$483)、雙人11,800日圓 (約$826) 嘅Plan，住eco villa，包近「海マグロと島魚の漬け丼」午餐、120分鐘鐘乳洞探險半價 (原價5,900日圓，約$413) 同150分鐘紅樹林獨木舟遊覽半價 (原價5,900日圓，約$413)，即係俾一個活動原價玩晒兩樣。如果有興趣玩呢兩個活動，其實都幾抵。以二人計，11,800日圓再加5,900日圓 x 2，即係每人$826，活動餘額要到時畀錢。
如果淨係計Plan嗰部分，簽11,800日圓，連埋信用卡外幣交易手續費大約$842，用以下信用卡可以賺到：

建行(亞洲)eye卡
網購5X積分，「賞即飛天地」旅遊類或外幣簽賬額外2X積分，一共7X
可獲4,210分
獎賞價值：$16.84 / 280里數

中銀i-card
網購10X積分
可獲 8,420分
獎賞價值：$33.68 / 561里數

渣打亞洲萬里通萬事達卡
網上 / 外幣簽賬$4=1里數
可獲210里數

 

限時優惠：
【申請DBS Black World MasterCard賺12X DBS$及$150禮券！ 】
【經HongKongCard申請美國運通I.T Cashback卡，可額外獲贈$200禮券】
【經HongKongCard申請WeWa卡，額外享$200現金回贈】