專訪Big Echo劉麗萍：慳1蚊等如賺1蚊

Big Echo曾經係香港卡拉OK業界龍頭，高峰期有18間分店，但03年沙士頂唔住，全線分店倒閉，身為老闆嘅Apple姐（劉麗萍）無奈轉行，一度風光不再。不過今年Apple姐復出卡拉OK界，喺旺角太平道重開Big Echo i-Box。佢喺專訪中同我哋大談佢理財上嘅轉變，分享「慳1蚊等如賺1蚊」嘅道理，仲話無懼15%印花稅，會繼續買樓投資。

▼位於旺角太平道嘅Big Echo i-Box。

 

自小家貧嘅Apple姐曾立志長大後唔可以窮。佢長大後試過同一時間打多份工，賺錢好快，廿幾歲女已成立自己嘅公司，仲同日籍前夫結婚，事業家庭兩得意，Big Echo嘅生意亦愈搞愈大，一度成為香港嘅業界龍頭。

風光嘅時候，Apple姐買嘢一擲千金，去shopping唔會慢慢買衫，「我要買衫，一入果間鋪頭呢，就呯呯嘭嘭咁買，因為我都唔得閒睇咁多間，變咗某程度上揮霍啲。」佢舉嘅例子真係嚇死人，「我入Gucci shop，一入去我就洗幾十萬架喇。」

 

▼Big Echo i-Box董事劉麗萍。

 

不過03年沙士令Big Echo生意一落千丈，冇幾耐仲全線倒閉，Apple姐風光不再，仲一度轉行做銷售生意。呢個時候，佢就諗起一位朋友嘅說話：「你知唔知賺1蚊係好難架，你慳1蚊等如賺1蚊」。依家Big Echo重開，Apple姐固之然要多謝朋友相助，但因為呢句說話，影響今日經營生意原則，並用來告誡佢嘅員工。

 

▼內有一間可以玩VR遊戲同Chroma key嘅房間。

 

沙士一個浪打埋嚟，改變咗Apple姐好多。今日佢出入雖然唔會搭巴士地鐵呢啲交通工具而只搭的士，但購物同飲食上嘅花費已懂得收斂，貫切「慳1蚊等如賺1蚊」嘅道理。

講到投資，Apple只買磚頭。90年代香港樓價飆升，Apple姐一買一賣，隨時賺一個開，「好似我加洲花園，返嚟係300幾400萬，我都係求其噏 600萬啦，專登開大啲費事你要我去睇樓吖嘛，咁佢（買家）都制。」結果唔使睇樓，買賣雙方律師樓完成交易，「每每好快就賺到好多錢。」

不過政府將非首次置業嘅印花稅加到15%，Apple姐仲會唔會繼續買磚頭？佢就話，加稅令樓巿

淡靜，賣家大可以唔放售，「我覺得，加，咪唔咁快放囉，或者自己衡量。」佢話做生意嚟講，租金、人工等成本都會上升，最緊要做出適合嘅選擇。

 

▼當然仲有主題K房啦。

 

其實試玩咗咁耐，用iPad點歌都幾方便，VR同chroma key夠晒潮夠晒好玩，而且K房各有主題，環境舒適，新歌舊歌都齊晒。Apple姐仲話，其實佢哋依家都搵緊位開分店，話唔定仲有其他主題K場出現。每次唱K唱唔同房，夠晒新鮮感，咁一大班朋友就唔怕唱K唱到悶啦。

 

Big Echo i-Box地址：旺角太平道6號地下及一樓