如果你同我同年代一定會對佢地有共鳴（下）

事隔2星期，GG又係時候出下集喇，多謝大家對上集嘅支持！
無睇上集嘅就快啲去呢度睇返啦

Xanga 100問
上集同大家講到xanga，講左啲閃閃字，其實未完㗎，仲有「100問」呀記唔記得？多數如果想比心儀嘅佢知道你鍾意佢，就會係「你有無鍾意嘅人」呢類問題答有，再tag佢做呢個100問。仲有做完呢啲「100問」最尾幾條一定係問你做完呢100條問題嘅感受，係好無聊㗎，但以前又真係好多人做㗎喎，你試下依家facebook再貼100問然後tag人，你睇下依家幾多人會照做吖，至少我唔會囉，依家嘅世界真係無咗呢種小情趣嚕。

順帶一提，玩Xanga之前仲有玩過HKFLASH㗎，成日無聊都會上去畫下嘢，不過好似唔係好紅，唔知大家有無玩過呢？

3台 VS 人仔台
仲未有Whatsapp嘅時候，大家除左煲電話粥就係SMS，為左同朋友SMS，大家都會轉去同一個台因為同台SMS免費。當年最紅嘅兩個台就一定係人仔台同3，聽啲人講港島區就用3，新界同九龍就用人仔台。以前喺啲Forum度仲會有人仔台揮手區，方便人仔台嘅人可以用SMS溝通下。而如果去chatroom，人地想攞你電話，第一句都會係「人仔台？」「3？」不過依家人仔台都摺左變左中國移動lu，人仔台呢個名過幾年應該都無咩人記得。

Yes! Card
抽YES！ Card 無疑係我地年代其中一個最愛嘅課外活動，每個＄1硬幣都要儲起，因為佢代表著一個希望，一個抽到偶像閃卡嘅機會。早期，我最期待嘅就係抽到Twins, 一來好鍾意佢哋，二來佢地嘅市場價係最高嘅，可以同同學換到一啲靚卡。如果抽到閃金簽名卡，閃底卡，夜光卡，幻燈卡，透明卡，閃簽夜光卡呢類特別卡就真係不得了，$1帶來嘅快樂分分鐘勁過中六合彩。
到後期少少，就會想抽啲台灣偶像棒棒堂，飛輪海嘅Yes!Card。銷售Yes!Card 亦成為一門生意，唔啱嘅就放上Xanga睇下有無人買或者換。話說我某日偶然見到部扭卡機，心血來潮想扭下，重溫嗰種扭出黎卡拉卡拉嘅聲音同手感，再要用小小力拉張卡出黎，個心撲通撲通咁跳揭曉到底抽到邊個偶像嘅感覺，點知抽到啲韓國偶像團體，而我不知他們是誰...

跑Online
「今晚跑唔跑呀？」曾經係每日都會問同學嘅一句話。G以前唔係真係話好鍾意打機，但呢隻game真係男女通殺。大家一定試過出「雞」跣人同升Lv換飛鞋，我最鍾意就係玩雪女場，成日日練夜練去刷新紀錄。嗰陣真係通宵玩為求儲TR，裝飾自已嘅人物。不過聽講依家嘅跑online已經變成課金嘅世界，以前真係靠技術㗎，依家有錢有裝就得，變哂質lu！
順道同大家聽返呢首Stephy唱嘅主題曲啦，有無勾起你嘅回憶呀？
https://www.youtube.com/watch?v=l-1c6xObGcA

線上遊戲
Flash Game盛行嘅時代，就算女仔唔識玩online game都一定有玩過，所有遊戲都唔會用好多時間，而且遊戲免費，我每日都一定花幾個鐘係呢啲線上遊戲網站。當時出名嘅網站有：新線上遊戲地帶，線上遊戲帝國，波波線上遊戲網等。就等我分享下我嗰陣最喜愛嘅幾個小遊戲啦～～好野～我依家都玩得好興奮，唔知你地玩過邊個呢？比埋Link你地，都市人咁忙，得閒都玩下回味下啦！
P.S. 為左整啲GIF， G全部都係自己親身玩緊，本身想分享5大架咋，但係玩玩下玩到停唔到，啲回憶Game出哂嚟呀不得了。

1）貓狗大戰
http://www.ugameasia.com/i-game/play.php?ID=359
隻貓同隻狗個笑聲真係好好笑，隻game有得兩個一起玩，係以前啲game算小見架。