好芝味！The Cheesecake Factory 登陸海港城

來自美國嘅人氣芝士蛋糕店The Cheesecake Factory喺5月1號登陸咗海港城喇！香港店面積有9,000呎，可以容納到280幾個客人。其實The Cheesecake Factory於1978年喺美國加州起家，香港分店係全球第210間店。

店裏大大個蛋糕櫃超吸引眼球，因為The Cheesecake Factory提供26種美國直送芝士蛋糕咁多！另外仲有超過200款份量驚人嘅前菜同熟食，例如沙律、漢堡、意粉等。花多眼亂唔知試邊款？睇睇以下介紹啦。

1.原味芝士蛋糕$69

New York Cheese Cake原形。質地鬆軟，味道幾清淡，酸忌廉味比芝士味突出，所以唔會滯，幾適合香港人口味。

2.士多啤梨芝士蛋糕＄79

以原味芝士蛋糕做base，加上裹滿糖漿嘅原粒士多啤梨，軟滑香濃，酸酸甜甜，比普通芝士蛋糕開胃，唔怪得會成為The Cheesecake Factory招牌。

3.無敵紅絲絨芝士蛋糕$79

2009年首度登場，即成為最受歡迎芝士蛋糕之一。紅絲絨蛋糕同芝士蛋糕層層相間，賣相一流！蛋糕外面裹滿忌廉芝士糖霜同白朱古力。食過後終於明白點解咁好賣，因為當中紅絲絨蛋糕質感濕軟，口味清淡，可中和芝士蛋糕嘅濃郁味道。

4.朱古力慕絲芝士蛋糕 ＄79

朱古力芝士蛋糕好重朱古力味，真材實料！軟綿幼滑，入口即溶。表面加咗一層比利時朱古力慕斯，提升視覺同味道層次。

 

5.亞當花生醬特濃朱古力芝士蛋糕＄75

好豐富嘅雲石芝士蛋糕，混合咗焦糖、花生醬、Butterfinger花生醬夾心朱古力碎、Reese's花生醬。就咁食會有啲膩，建議同朋友share或者混碟上嘅cream一齊食。

 

其他菜色：

1.羽衣甘藍藜麥沙律＄128

 

份量好多！可以畀4-5人食。沙律用上羽衣甘藍、藜麥、提子、紅燈籠椒、葵花籽同巴馬臣芝士，特別一提係巴馬臣芝士份量好慷慨，而羽衣甘藍好嫩，因為特別用上檸檬汁處理，所以有別於出面食嘅質感。

 

2.馬德拉酒雞肉＄228

The Cheesecake Factory最暢銷嘅雞肉菜式。香煎雞胸肉鋪上鮮蘆筍、熱熔蒙紗里拉芝士，淋上鮮蘑菇馬德拉酒汁，配薯蓉。雞胸肉份量好多，足夠4人食，煮得夠嫩滑。

 

The Cheesecake Factory香港店

地址︰香港九龍尖沙咀廣東道 25 號海港城港威商場地下 G102 號舖

營業時間：
星期一至星期六：11:00-23:00
星期日：10:00-23:00

電話：2791 6628