奧海城露天聖誕市集 超過100個攤位

奧海城露天聖誕市集 超過100個攤位

相關信用卡:

奧海城露天聖誕市集 超過100個攤位

發表日期: 2016 年 12 月 05 日 更新日期: 2016 年 12 月 05 日 生活

作者:ccyik

一年先有一次嘅聖誕節當然要玩盡佢啦!上次CC我就帶大家去咗糖廠街白色聖誕市集,今次就帶大家嚟到奧海城同香港市集協會再次合作舉行嘅聖誕市集。呢度有超過100個攤位,想購物又或者想買聖誕禮物,嚟呢度一定包你買到野!

  • 超過100個攤位喺奧海城2期露天廣場排得齊齊整整,中午去到已經有好多人,場面非常熱鬧。有一家大細一齊黎購物,亦都有情侶結伴嚟呢度感受聖誕氣氛。

而家就等CC我介紹幾個得意嘅攤位比你先!

【特色攤位】

  • 呢個攤位主要賣自製schedule,每本schedule都係檔主花心思去製作,擁有唔同嘅圖案同風格。對於我呢啲超級鍾意簿仔嘅人黎講,見到佢地,真係雙眼發光啊!

  • 大部分既女仔都鍾意花,而當隔離仲有個可愛龍貓嘅時候,成件事就更加吸引!呢個攤位賣既花全部都係日本保鮮花,可以保存2-3年咁耐!呵呵,男仔們,你地識做啦~

  • 呢個椰子布甸 ($25) 非常好味!口感比平時食既布甸滑,而且一食落口就感覺到好濃郁既椰子味,仲有大大塊新鮮椰子肉,值得一試!
  • 好味指數:★★★★☆ (5分滿分)

  • 而流心芝士年糕就相對遜色,芝士味雖然濃,但就無流心。
  • 好味指數:★★★☆☆(5分滿分)

  • 呢個攤位專賣訂做既鎖匙扣同手機殼,個個款式都好得意啊!如果你鍾意咩公仔,比張圖佢,佢就可以幫你整,就算係人樣都整到架!

奧海城聖誕市集會繼續喺黎緊三個星期嘅週末(10 -11日、17 -18日、24 - 25 日)舉行。而17 至 18 日同24 至 25 日 2pm-6pm更會設兒童檔主專區,讓小朋友自己做擋主,賣自己製作既手作!當中嘅一半收益,仲會捐俾「愛心聖誕大行動」,想去幫襯,就記得星期六日去啦!

 

「奧海城 聖誕市集」

地點 :奧海城 2 期 G/F 露天廣場

日期:10 至 11日、17 至 18日、24 至  25 日

電話:2740 4108(奧海城) /  2851 3220 (香港市集協會)

付款方式:現金,不接受信用卡