「失身酒」起底!一罐斷片話咁易?

「失身酒」起底!一罐斷片話咁易?

相關信用卡:

「失身酒」起底!一罐斷片話咁易?

發表日期: 2016 年 09 月 08 日 更新日期: 2016 年 09 月 08 日 生活

作者:Yvone 二方

近來網上大熱號稱「一罐斷片」,更有「失身酒」之稱嘅Four Loko。有見到唔少人挑戰呢罐酒都醉到有失常態,甚至瞓低叫唔醒。到底呢罐「斷片神器」有咩咁勁,可以令人飲完一罐就爛醉如泥?飲酒時我哋有咩要注意?我哋今次就一齊睇下啦!

Four Loko是甚麼東東?

Four Loko係美國公司Phusion Projects推出嘅酒精飲品,最初係一個酒精混合咖啡因嘅飲品,以生果味做賣點。某啲地區禁止呢隻飲品出售後,喺2010年,佢就改咗配方,剔除咗咖啡因及牛黃酸等嘅成份。而家根據唔同嘅地區,飲品嘅酒精濃度會由6%-14%不等。

剔除嘅成份係咩來?

Caffeine (咖啡因)
咖啡因相信唔使多解釋,咖啡因可以減少疲勞嘅感覺,亦可以減低睡意幫助提神。當佢結合咗酒精,佢可以令醉酒嘅表面徵狀減輕,所以好易唔覺唔覺飲咗比平時多嘅份量。根據數據,通常飲用呢類咖啡因加酒精飲品嘅人比唔飲呢類飲品嘅人士有3倍機會出現濫飲嘅情形(binge drinking),飲用呢類飲品嘅人亦有較大機會報告佢同人有親密嘅身體接觸。

Taurine (牛磺酸)
牛磺酸係一隻氨基磺酸(amino sulfonic acid),係膽汁嘅主要成份,佢天然存在喺食物當中,尤其係海鮮以及肉類。牛磺酸對於我哋中央神經系統有紓緩不安嘅作用(anxiolytic effect),或者可以降低呢類飲品中咖啡因產生嘅不安。

Guarana (瓜拿納)
Guarana (瓜拿納)可以用於提升運動員嘅表現,亦可以用作一個興奮劑(stimulant),可以減少疲累,常常被加到能量飲品中。瓜拿納有咖啡因,亦含有跟咖啡因結構相似嘅茶鹼(theophylline)及可可鹼(theobromine)。

「失身酒」酒精有幾多?

市面上買到嘅Four Loko一般都係12%,意思即係100ml嘅飲品入面有12ml係酒精,而啤酒一罐通常係5%。即係飲同等份量嘅液體,飲Four Loko吸收到嘅酒精係飲普通啤酒嘅2.4倍。而且Four Loko一罐嘅容量亦比普通一罐啤酒嘅多,一罐Four Loko有695ml,而其他啤酒多數都係一罐330至500ml。如果考慮埋容量,飲一罐Four Loko就大約飲咗3至5罐啤酒。如果以40%酒精濃度嘅伏特加來比較,飲一罐Four Loko就大約等於飲咗200ml嘅伏特加,差唔多成包紙包飲品咁多㗎。

Four Loko嘅包裝感覺似果汁汽酒,加上果汁味易入口,會好易唔覺意飲多咗都唔知。其實佢嘅酒精濃度同紅酒差唔多,飲成接近700ml紅酒,差唔多成支梗係易醉啦。


▲有氣又有果味,好易入口,一個唔小心飲大咗都唔知

其實能量飲品溝酒精唔係新鮮事,出去飲嘢時都會見到一啲red bull溝酒精嘅飲品,例如Jager Bomb咁,叫嘢飲時都要留意番佢係用咩材料溝啊!之前都出現過一啲高酒精濃度啫喱,食一個又係會已經吸收咗好多酒精。喺酒精面前真係要量力而為,唔係真係攞自己辛苦。

你知道呢啲飲酒嘅二三事嗎?

飲酒面紅即係好飲得?
有人話飲酒面紅係酒氣散得快係好事,其實飲酒面紅係因為身體缺乏咗一種分解酒精嘅酵素,令血管擴張面紅紅,同飲唔飲得係冇關係㗎。

飲完酒第二朝個頭赤赤痛?
可能大家都有呢個經驗,就係夜晚飲完酒第二朝起身頭痛或頭赤赤,咁有可能係因為身體脫水了。酒精有利尿作用(diuretic effect),當你飲一杯酒精飲品,身體可以排出多達4倍嘅液體,做成第二朝嘅唔舒服。想避免呢個情況,不如考慮下飲完酒飲多啲水先瞓覺啦!

如果習慣去超級市場買酒飲嘅話,由即日起至2016年10月31日,客戶憑匯豐信用卡於百佳單一簽賬滿$500送$50現金券乙張;以手機付款額外送$10,即$60現金券乙張。
信用卡優惠詳情可以去<呢度>睇。

資料參考:
http://www.cdc.gov/alcohol/fact-sheets/caffeine-and-alcohol.htm
http://www.webmd.com/balance/features/how-to-hold-your-liquor
http://www.globalhealingcenter.com/natural-health/dangers-of-taurine/