大人細路同蒲蘭桂坊

一講去蒲，自然會諗起「老蘭」蘭桂坊，亦會聯想到飲酒、Clubbing、玩通宵，感覺上 (實際上都係) 去老蘭蒲都係成年人嘅專利。不過每年「蘭桂坊嘉年華」，就啱晒大人細路一齊去蒲，老少咸宜。

今年「蘭桂坊嘉年華」將會喺今個月11號同12號舉行，由下晝1點開始一貫森巴式嘉年華，街上面好多檔口賣酒賣小食，仲有森巴舞女郎、非洲鼓手、街頭表演藝人、雜耍等表演者組成嘅巡遊隊伍，炒熱氣氛。今年仲為咗慶祝西班牙國慶日，增設「西班牙街」，會有Flamenco、傳統結他演奏、魔術、小丑等表演。
 
 
除咗大人活動，「蘭桂坊嘉年華」亦有一段「兒童街」，會有好多適合小朋友欣賞嘅節目同表演，亦有攤位遊戲，下晝帶佢哋去玩就啱晒。

雖然攤位多數收Cash，不過都要帶定蘭桂坊食肆酒吧有著數嘅信用卡，例如美國運通卡、渣打WorldMiles卡、中銀卡，部分食肆例如Azure Restaurant Slash Bar用其他信用卡都會有優惠，玩完可以順便喺附近食埋飯，食完飯大人可以繼續夜蒲。