國泰大失血 三年計畫翻到身?

國泰大失血 三年計畫翻到身?

相關信用卡:

國泰大失血 三年計畫翻到身?

發表日期: 2017 年 03 月 19 日 更新日期: 2017 年 03 月 19 日 生活

作者:甦師父

繼前年大賺60億元之後,國泰日前公布去年業績,收益大跌9.4%,全年蝕5.75億元,係8年前金融海嘯後首次見紅。除咗喺燃油對沖蝕大錢,國泰服務質素近年下跌,難以與同業競爭,結果喺全球各地的收益都下跌。國泰展開3年轉型計畫救亡,包括節流同削減人手成本,但會唔會反而令服務質素每下愈況,做成惡性循環,最終搞到難以翻身?

全球收益下降

蝕咁多,原因之一係燃油對沖的$84.56億虧蝕,國泰預計今年繼續會蝕,但較去年少。其實國泰前年對沖都蝕咗$84.74億,兩年的數字接近,如果將國泰蝕大錢的主原歸咎於「賭」輸錢,咁就忽略國泰服務質素下降,同埋同業競爭的影響。

國泰去年客運服務、貨運服務、航空飲食收入,分別下跌8.4%、13.2%同6.7%;頭等同商務艙載客量錄得雙位數下跌,跌到僅剩50%,國泰管理層賴,同金融、銀行業減少開支,少派人公幹旅行有關。經濟客位載客量則達9成,整體載客率由前年85.7%,跌至去年84.5%。

國泰喺全球各地的巿場都出現收益下降,好似嚟自香港同內地的收益就由$514億減至$469億;日韓台由$94.5億減至$87.7億,另外歐洲同東南亞一樣出現收益下降。

▼國泰面對的競爭激烈

同業競爭激烈

收益下降,唔係因為全世界的人少咗搭飛機,而係搭少咗國泰,轉搭其他航空公司。好似中東三大航空公司:阿聯酋、卡塔爾同阿提哈德,早已吸收唔少喺中東轉機到歐洲的東亞旅客。維珍澳洲又會喺下個月開往返悉尼同香港的航班,國泰一直面對國際大型航空公司的正面競爭。

另外,內地的航空公司發展迅速,國航、南航同東方航空近年着手開闢國際直航航綫。就以國航為例,舊年9月同11月就分別開設上海浦東往返美國加洲聖荷西航綫,同埋成都往返悉尼的航綫,而且今年5月,仲會開埋北京往返蘇黎世、雅加達,上海浦東往返巴塞隆拿,深圳往返洛杉磯的航綫。

好似春秋航空之類的廉航又喺內地崛起,內地乘客選擇多咗,同時減少透過國泰轉機飛外國的誘因。

▼內地廉航機票價格平,削弱國泰喺內地巿場的競爭力

服務質素下降

喺面對日益激烈的競爭下,國泰不思進取,仲以難以增加航班為由,計畫將波音客機機隊每行座位由9個加至10個,座位闊度由18.5吋減至17吋。又有國泰職員向傳媒透露,現時客機提供的毛氈、枕頭數量經常唔夠派,加上增加座位令乘客量上升,加重空姐工作量,影響服務質素,得不償失。

受惠油價下跌,服務質素較低的廉航機票愈嚟愈平,國泰旗下並無廉航,巿場佔有量逐漸被蠶食,廉航如香港快運載客量上升,上個月客運量較去年升愈1成,此消彼長下,國泰喺短期內翻身的話,相信幾難。

節流拉低質素

為此,國泰展開3年轉型計畫,包括精簡架構同降低成本。至於會否裁員,行政總裁朱國樑話,計畫今年請多1,300名機組人員,遠較去年700人多。不過稍後國泰宣布,或會裁撤香港總部中、高級管理層,削減3成管理人員成本。

現時國泰遇上危機,短期內開源困難,節流會唔會令服務質素再下降,打擊前線員工士氣,走入惡性循環,進一步削弱競爭力,繼續跑輸其他航空公司?都唔係冇可能喎。

▼國泰將減低人手成本,會唔會影響前綫員工士氣?