嚴選新春超值團 一家大細平玩之選

嚴選新春超值團 一家大細平玩之選

相關信用卡:

嚴選新春超值團 一家大細平玩之選

發表日期: 2017 年 01 月 08 日 更新日期: 2017 年 01 月 08 日 旅遊

作者:甦師父

聖誕節過後,另一個大節日農曆新年就到了,好多人都會去吓旅行咁。唔少旅行社都力谷新春團,不過成個1同2月係旺季,團費唔平架。筆者就喺眾多嘅旅行團中精選咗3個東南亞嘅泰國、星馬同台灣團出嚟,畀大家參考,其中泰國同台灣團團費夠平,啱晒budget唔多嘅人一家大細輕鬆去旅行,就算請埋父母長輩去玩都唔會好傷荷包,仲可以順便做吓孝順仔女。

泰國 曼谷+芭堤雅

去泰國旅行勝在一嚟團費同機票酒店唔貴,二嚟可以好好感受陽光與海灘,三嚟吃喝玩樂都物超所值。你知啦,一家大細去旅行,唔少錢架嘛,揀個平價團真係好重要。

咁有乜旅行社搞緊超值泰國團呢?筆者物色完一輪,發現美麗華旅遊嘅「曼谷、芭堤雅五天抵玩團」算係名副其實嘅抵玩。

講咗有乜玩先啦。呢個團Day 1一落機曼谷就去3D幻覺美術館睇吓,之後就去水上巿場,夜晚去芭堤雅夜巿,輕輕鬆鬆。打後幾日有得騎大象、去吓shopping mall、享受傳統泰式按摩咁,唔會話玩到好攰,啱晒長者跟團玩埋一份。去到珊瑚島,團友可以玩水上電單車、空中降落傘等活動,當然唔建議長者玩啦,但後生仔就可以試吓。

好喇,講咁耐,咁到底呢個團平成點?呢個團團費$1,299起,但只要事先輸入你嘅電郵同姓名,簡簡單單咁登記做會員,網上報團即減$100,另外用恒生信用卡畀錢更額外減多$50,即係團費僅$1,149!一家四口去最平都係只需要$4,596,計埋機場稅、燃油附加費同行政費等等,埋單都係$6,508!

優惠詳情請按此

▼新春檔期仲可以$1,149去泰國!

▼一家四口都係$6,508埋單,唔佔床位嘅小童價更平

▼曼谷嘅水上巿場

台灣 台北

話明新春去旅行,有人固之然想感受吓新年氣氛,咁除咗大陸之外,台灣可以話係首選(不少旅行社將台灣歸納為「東南亞」)。

中旅社喺新春檔期推出嘅一個台北4天團,本來長者報團有$100優惠,但職員話有關優惠已經完咗。不過因為團費本身夠平,只需要$1,499起,所以都幾有吸引力。後生仔去台灣絕大多數都係自由行,如果同父母,甚至祖父母級嘅長輩去跟團,做孝順仔女,畀埋佢哋份錢都唔會好肉痛,確係新春平價旅遊之選。

咁呢個團有咩玩呢?老實講,咁嘅價錢真係唔好奢求咁多,除咗聲稱到陽明山國家公園賞櫻,又會到菁桐放祈福天燈、行饒河街夜巿、坐吓貓空纜車咁,行程一啲都唔豪華,但勝在夠悠遊,唔怕趕行程趕得太辛苦。

不過要提大家嘅係,呢個團冇做任何優惠,但有機會睇到櫻花,算係咁啦。

▼1月都仲做到團費$1,499

▼2月嘅旅行團選擇多,但團費做到$1,499嘅只有兩團

▼想喺陽明山賞櫻?講運氣架

星馬

講到東南亞,點少得星馬?康泰依家做緊「馬星5天優閒之旅」,行程主要睇名勝,例如新加坡濱海灣花園、魚尾獅公園;而馬來西亞嘅黑風洞、荷蘭廣場呢啲景點當然唔少得,另外都會去新加坡嘅牛車水飲飲食食等,行程唔趕。

不過報費方面,大家就要小心衡量。首先,雖然呢個團嘅團費係$2,999起,但因為農曆新年多人去旅行,最快要去到2月上旬先回落至約$3,200!一家四口去嘅話,團費都要畀超過$12,000!

另外,呢個團做緊早報名同渣打卡優惠,報團每位分別可減$700,但有職員向筆者透露,早報團名額有限,要打電話查詢先知道減唔減足$700,而且農曆年過後,呢個優惠隨時冇,所以報團前記住問清楚個價錢呀。

優惠詳情請按此

▼$2,999去星馬算平,但到時渣打卡仲做唔做到優惠,就要問清楚喇