嘉嘉♥勁搶$100商務艙機票

相信有留意開平價機票嘅朋友都知道，國泰逢星期二都有「fanfares」，會推一堆唔同目的地嘅特價來回機票出嚟。至於筍唔筍喇喎，就見仁見智啦。不過聽日 (8月26號) 個「fanfares」就真係要留意下喇，因為有$100商務艙同特選經濟艙嘅機票@@！

點解咁益街坊呢？因為國泰今年被Skytrax世界航空公司大奬選為「全球最佳航空公司」，為咗慶祝，就推2,014張$100機票，可以揀商務艙嘅地點包括曼谷、宿霧、吉隆坡、名古屋、大阪、台北；特選經濟艙就有芝加哥、倫敦、馬爾代夫、紐約 (紐瓦克)、悉尼。飛日本連稅$800多啲，飛馬爾代夫、美國、澳洲$2,100至$2,700左右，飛英國$3,600、的確係抵到爆！正式出發日期未知，估計應該係11月中同埋8月尾9月頭。每人每次最多可以買兩套機票，照慣例聽朝8點開波，大家記得早啲起身，預備不停「F5」啦。



買「fanfares」飛可以賺25%實際飛行哩數，用恒生信用卡網上做旅遊類簽賬有3X Cash Dollars優惠，或者用專儲里數，同埋換里數免手續費嘅卡訂飛，例如Citibank PremierMiles、DBS Black World MasterCard / American Express 卡。又或者用AE卡網上簽滿$200或以上，就有1次抽獎機會，抽中贏50,000里數。