嘉嘉♥做人定做屍？

平時睇戲、打機都有好多關於喪屍嘅題材，有啲好核突，有啲好得意，不過呢個題材其實唔太係我杯茶。但係遲啲10月2日，喺西九文化區西九海濱長廊有個叫做「RUN FOR YOUR LIVES嘉年華」嘅活動，都係用喪屍做賣點，又好似幾過癮咁喎。

其實呢個可以算係一個障礙賽，參加者可以揀做生還者或者做喪屍，做生還者嘅話每人有三條命 (打機咁樣)，要剩返最少一條命到達安全區，途中會有障礙關卡同好多喪屍阻住你，到咗安全區仲可以開Party。做喪屍嘅就會化晒死人妝，係逃生路徑中扯咗生還者身上嘅旗仔 (即係命) 落嚟。唔... 到底做人定做喪屍好呢？做生還者好刺激，但要跑5公里，又要擒上擒落都好大運動量，我驚唔使一陣就脚仔軟兼冇晒啲命仔>.<。做喪屍有專人化妝，又可以自己裝扮，應該會幾好玩。聽聞聽日開始賣飛，接受PayPal同信用卡，早兩日積克ching講過星展做緊PayPal回贈，不過用係呢度買飛好似唔及其他卡賺分咁著數喎，好似中銀i-card網上零售交易有10倍積分。