嘉嘉♥信用卡交稅交差餉賺積分

到咗年尾，又係交稅、交差餉嘅時間，除咗真金白銀現兜兜咁交，亦可以用信用卡經網上銀行做網上繳費，就可以照樣賺積分。而部分銀行嘅信用卡優惠亦適用於網上繳費，可以賺埋額外獎賞。

首先講下交差餉，同埋其他公共事業機構費用，例如水電媒，都可以喺網上銀行繳付政府或法定機構費用，用中銀、匯豐、渣打、恒生、AEON、建行 (亞洲)、上海商業銀行等嘅指定信用卡都可以賺到基本積分。

而有啲銀行會有特別賺分比率或方法：

富邦白金卡/ Titanium卡
星期六或日繳費$300或以上，可賺2X積分。

永隆信用卡
網上繳費每$500，可以賺$1現金回贈或者200分。

信銀國際白金卡
每交滿$180有$1現金回贈，普通卡就$1=1分。

中銀信用卡 / y not信用卡 / U-point信用卡 / 聯營卡
經櫃員機「繳費易」服務繳費有$1=1分

至於用信用卡交稅，除非係有特別Promotion，否則絕大部分銀行都冇分賺嘅。不過仍然有方法可以間接地賺分，首先用建行 (亞洲) 銀聯雙幣卡經網上銀行交稅，呢次係冇分嘅，然後用匯豐白金卡喺網上銀行找咗建行 (亞洲) 銀聯雙幣卡條數，就會有「獎賞錢」賺。