嘉嘉♥中秋有乜節目?

嘉嘉♥中秋有乜節目?

相關信用卡:

嘉嘉♥中秋有乜節目?

發表日期: 2014 年 09 月 08 日 更新日期: 2014 年 09 月 08 日 購物

作者:艾力嘉

今日係中秋節,主要節目自然係賞月,不過天氣唔多好,天文台話大致多雲,甚至有狂風驟雨,即係今晚隨時冇月賞,聽聞今晚仲有超級月亮,月光特別大,睇唔到真係掃興呀>.<。最慘係仲會落雨,如果約咗朋友去BBQ,真係唔知照去好還時Cancel改地點改活動好嘞。不過嘉嘉相信即使落雨,都淋唔熄大家出去心入面慶祝中秋嗰團火嘅,冇得賞月,都仲有好多地方可以去,亦唔一定淨係吃喝玩樂,都可以過得好充實。

PMQ元創坊
地點:中環鴨巴甸街35號
日期:9月8號、9號
時間:14:00至23:00
簡介:PMQ係由三級歷史建築已婚警察宿舍活化而成,入面有好多Local設計師同創業者開嘅舖頭同Workshop,中秋期間PMQ都會掛滿燈籠,有Photo Booth自助印相機,可以免費印相,紙藝工作坊可以試下自製花燈,仲有Live Band表演。

「活化廳」中秋活化墟
地點:油麻地熙龍里與上海街交界
日期:9月8號、9號
時間:20:00至23:00 / 15:00至19:00
簡介:「活化廳」係由本地文化藝術工作者組成嘅藝術組織,藉著唔同主題嘅Project,將藝術融入社區與生活。呢個中秋活化墟會有跳蚤市場 (唔止買嘢,佢哋話可以嚟擺檔,同人以物易物都得)、猜燈謎、月餅分享、喺上海街呢個咁有本土氣息嘅地方,同班街坊傾下偈,了解下舊區嘅歷史同發展,感受一下香港獨有嘅人情味。

妙想氈開天水圍
地點:天水圍東華三院天秀墟正門空地
日期:9月8號
時間:16:00至22:00 (工作坊) / 18:30至22:00
簡介:由香港中文大學建築學院同新聞與傳播學院主辦,將會攤開綠色草地氈,擺晒豆袋梳化,播放由天水圍天主教培聖中學20名學生攝製嘅社區短片,記錄區內各階層人士嘅故事,進一步認識天水圍,關心一下社會。亦可以去天秀墟行下,支持下本土小舖同檔攤。

apm
地點:九龍觀塘觀塘道418號
日期:至10月5號
時間:12:00至00:00
簡介:除咗展出多款紙雕燈籠,9月8號正日21:00會有唱作歌手表演、占卜同猜燈謎。另外用電子貨幣 (MasterCardVisa、EPS、八達通) 消費滿$300 (1張飲食單加1張零售單),就可以換美食現金券、五星級酒店月餅或其他精美禮品一份。到咗今日,多數都唔會換月餅啦,即係得現金券可以揀。

大埔超級城上世紀餅模珍藏展
地點:大埔安邦路8及10號
日期:至9月24號
時間:12:00至21:00
簡介:而家啲月餅都係機製,以前就係人手用餅模一個個咁整出嚟,呢度展出咗三十個傳統酒家嘅餅模,由個模可以睇出以前嘅月餅係點樣嘅。

各區中秋綵燈會
康文署喺唔同地區都有搞中秋綵燈會,除咗有大型花燈展、猜燈謎、花燈紮作同手工藝示範,綵燈晚會會有各類文藝表演,「青年之夜」會有魔術、音樂、舞蹈、X-Game表演。如果天氣尚可,去維園可以睇埋大坑舞火龍。



綵燈晚會包含好多表演,例如中國地方舞蹈。

地點:荃灣沙咀道遊樂場
日期:至9月10號
時間:18:30至23:00* (綵燈展)

地點:維多利亞公園
日期:至9月14號
時間:18:30至23:00* (綵燈展) / 20:00至23:00 (綵燈晚會)

地點:大埔海濱公園
日期:至9月14號
時間:18:30至23:00*  (綵燈展) / 19:30至21:30 (9月8號青年之夜) / 19:30至22:30 (9月9號綵燈晚會)

地點:香港文化中心露天廣場
日期:9月8號
時間:18:30至23:00*  (綵燈展)

*8號正日延長到00:00

最後,嘉嘉喺度祝大家中秋節快樂,同埋希望今晚天色好轉,大家可以照自己原定計劃去慶祝去賞月,如果係咁,就算我上面嘅介紹變成白寫都無所謂啦^.^,最緊要大家開開心心過中秋!