商戶突然結業 信用卡簽賬有冇得退?

商戶突然結業 信用卡簽賬有冇得退?

相關信用卡:

商戶突然結業 信用卡簽賬有冇得退?

發表日期: 2015 年 08 月 04 日 更新日期: 2015 年 08 月 04 日 生活

作者:Lady C.

最近有一間大型傢俬電器連鎖店突然結業,最緊張嘅除咗唔知追唔追得返欠薪同遣散費嘅員工之外,仲有一班落咗訂買傢俬電器但仲未收貨嘅客人。係呢個情況之下,用信用卡一筆過俾晒錢,或者做分期,如果到最後收唔到貨,筆錢會唔會一去冇回頭呢?


全數付款有可能追得返
如果係簽卡一筆過俾晒錢,可以等間公司清盤,通常都係第三者向法院入稟申請清盤,法院就會委任臨時清盤人,買家就可以向臨時清盤人登記無抵押債權人,然後等變賣公司資產,再等賠償。

另外亦可以試下向發卡機構或銀行提出退款申請 (Chargeback),「未收到貨品 / 服務」係其中一項理據,至於實際退唔退到就好難一概而論。記住退款係有時限,如果過咗送貨期都收唔到貨,就要即刻搞退款喇。

如果係商戶嘅網上商店買,經PayPal俾錢的話,亦可以向PayPal提出退款。商戶結業通常都搵唔到賣家退錢,咁就要係交易後45日內提出糾紛申訴,而對未收到貨提出糾紛申訴,交易後最少要等7日 (如果金額超過2,500美元就例外),亦要喺20日內將糾紛申訴升級為索償,PayPal可能會要你交相關資料,記得留意住有冇收到呢類Email,同埋儘快回覆。如果都係收唔到貨或賣家冇回應 (執咗笠應該冇員工理喇?),就有可能退得返錢。

分期付款繼續供
如果係用分期付款形式俾錢,就可能要繼續供,因為分期付款其實係銀行幫你預先俾晒錢商戶,然後銀行再分期收返你錢,性質上可以算係分期貸款。萬一商戶結業,都可以試下向銀行申請停止供款嘅,但多數都要繼續供喇。就算銀行肯受理,喺處理申請期間,筆數亦可能要供咗先。