唧牙膏招標 想唧到幾時?

唧牙膏招標 想唧到幾時?

相關信用卡:

唧牙膏招標 想唧到幾時?

發表日期: 2018 年 07 月 20 日 更新日期: 2018 年 07 月 20 日 生活

作者:StillMoney

有時見到新盤靚單位下下都招標賣,雖然買唔起都覺得煩,以前就話幾千萬甚至過億豪宅才會這樣賣,但近年你見到連新界盤都玩招標,門欖越來越低,都會擔心會否成為常態?就像Grand Yoho二期,囤住幾百新盤,都不知想囤到幾時,若非空置稅消息逼近,大概也不會見到近期開始發力唧牙膏,每次招標賣幾個,唧吓唧吓,又把呎價唧到兩萬以上。上星期又賣4伙,全部集中在第5座中層E室,3房1套連儲物室898呎單位,最貴22樓,呎價$20,958,最平15樓,呎價$20,886,成交價錢由$1,875萬到$1,882萬,對呀,元朗都要$21,000呎,唔係新聞啦。而家佢還有400幾個未清,看來要再加速推了。

第5座中層
早日賣出4伙都在二期第5座中層,有水池園景,而且靠近西鐵站行人天橋,位置甚佳。

然而,招標看似是發展商佔盡優勢,明明有心水價又不公開,要人暗標落盤,不到價就收回,到價就價高者得,總之公就佢贏,字就你輸,反正求過於供,真正想換樓的用家,除了等政府出招,還可以點拆?但這招也有缺點,招標只能局限某些單位,例如位置優越的大呎數豪宅(如最近北角海璇的特色單位),或同區供應少需求大的單位(如上文Grand Yoho三、四房大單位),如要有大量單位要出售,要跟其他新盤打仗,則不能用招標方式,一定要有清晰銷售資訊,有價單,貨才去得快。

E室單位
E室單位898呎,3房1套連儲物房。

換言之,特別嘅賣法即是有特別嘅客源,暫時而言發展商都是長勝將軍,君不見拿得出來招標的單位,無一不賣到好價錢。既好賺,又推高整體呎價,何苦要心急?在商言商有好貨當然是hold住慢慢賣。對一般想上車人仕,雖不會參與投標,但樓市供應減慢,又不斷拉高呎價,就非常傷。牙膏究竟會唧到幾時?相信新辣招上場,逐間吉屋同佢計空置稅,會有所收歛,但從來辣招高一呎,發展商高一丈,換個方式唧牙膏亦非冇可能,不過筆者就睇好囤開地的波叔,一定有絕招對付囤新盤,大囤完結局。

(本文內容純屬撰文者個人意見,並不代表本網立場)