唔買港股買咩好？

2015年快收爐，截至12月10日收市恒指本年至今跌8.05%；國指更加大跌21.14%。我有個老友，下半年口頭禪係：「港股唔死都無用！」
 

如果你同佢有相同睇法，明年不妨放眼世界，睇睇目前各地股市表現如何，不用怕外國股市冷清難買，目前市面有好多與各地指數掛勾的基金可以買。

近年最多基金推「金磚四國(BRICs)」相關投資產品，先以俄羅斯、巴西和印度的主要指數截至12月11日最新的數據睇，俄羅斯RTS指數暫時升0.26%；巴西指數聖保羅指數(Bovespa Index)跌8.75%；印度SENSEX指數跌8.3%。

至於中國指數，幾個月內經歷過大牛和熊市，開大定開細？滬指升6.46%；深證成指升10.51%；深圳中小板指數升48.76%；深圳創業板指數(Growth Enterprise Index)升82.94%。雖然睇落好吸引，但你仲夠唔夠同膽買係另一回事，由於「金磚四國(BRICs)」經濟開始死火，某些投行已經取消再推出相關投資產品。

放眼全球除了深圳創業板指數暫時升幅冠全球、中小板指數排第三之外，排第二是阿根廷指數（MERVAL Index），升幅約52.77%。另外頭10位有6位是歐洲市場指數，暫時升幅約一成至四成，明年歐洲的QE將會繼續，歐元弱之際或者是買優質歐股好時機。

作為香港人，最重要一個素質係環球視野，對投資無興趣當多個常識。下次基金佬用歐股前景好SELL你買希臘股市相關產品果陣都識得大佢，因為希臘股市目前跌30.22%，是冠絕全球。

本文不構成任何買賣投資產品建議。