唔拍三級片 李雨陽「做雞」翻身

唔拍三級片 李雨陽「做雞」翻身

相關信用卡:

唔拍三級片 李雨陽「做雞」翻身

發表日期: 2017 年 02 月 09 日 更新日期: 2017 年 02 月 09 日 生活

作者:甦師父

2003年拍攝無綫青春劇《當四葉草碰上劍尖時》,李雨陽初登銀幕,開始為人認識,但及後喺無綫拍親都係「二打六」角色,冇乜發揮,簽約港視又無奈電視台不獲發牌,一度考慮過拍三級片清還財務公司數十萬債務。不過,勢估唔到,佢靠賣雞一鋪翻身,產品零售點遍布全港,仲打入大陸巿場!

曾欠財務公司3、40萬

依家李雨陽認識新朋友時,對方劈頭嘅第一句話好多時都係,「我睇你《四葉草》(長)大!」李雨陽笑言,「我第一個感覺就係:嘩,譚玉瑛姐姐呀!」

譚玉瑛雖然冇做兒童節目好耐,但話晒都係兒童節目界嘅神枱級人物,李雨陽呢?佢喺無綫9年,一直冇乜發展機會,之後港視招攬佢拍劇,簽埋4年合約,本來以為有機會翻身,點知政府唔發免費電視牌畀港視,李雨陽嘅演藝事業可以話畫上大大嘅休止符,「變咗好似,死喇,失業!」

就算留喺無綫,經濟狀況唔見得比失業好好多。離開無綫前,李雨陽「搵嗰對『兄弟』(財務公司)幫手」,借咗3至40萬。為咗還債同生活,李雨陽連2、3千蚊報酬嘅騷都照接。

▼李雨陽以為東家唔打打西家,演藝事業或有起色,但港視不獲發牌,佢冇戲拍,慨嘆,「變咗好似,死喇,失業!」(港視《導火新聞線》截圖)

唔拍三級片還債

及後蕭定一搵李雨陽拍三級片《3D肉蒲團之極樂寶鑑》,佢坦言為咗能夠還清債務嘅片酬,的確心動過。不過佢知道,拍咗三級片,隨時要「洗底」一段長時間先回復「清白之身」,「如果拍完之後,會影響我幾年,我咪即係重蹈覆轍?」

李雨陽唔拍三級片,演藝事業可以話進退失據,但勢估唔到,唔拍三級片,唔做鴨,佢竟然可以靠「做雞」,一鋪翻身!

推銷送貨 親力親為

點「做雞」法呢?話說早年有位前輩同李雨陽講,佢研發咗「原味雞」嘅冷凍技術,但一直冇人將之「發揚光大」,建議李雨陽:「當環境唔係咁明朗嘅時候,你會唔會考慮吓,學吓做生意呢?」「原味雞」,即係啱啱屠宰嘅雞隻,經過多種冷凍技術後,鎖實原有雞味,烹調過後,味道足以媲美新鮮雞。

李雨陽決定同人合夥搞「原味雞」生意。生意從零開始,李雨陽凡事親力親為,攞住電磁爐同電煲,走訪全港各大小凍肉鋪,向老闆示範點煮「原味雞」。當第一家鋪頭入貨,第二第三家接踵而來,「初頭接到生意,真係我一個人拖住旅行篋,逐家逐戶去送(貨)。有啲客開門見到(我),嘩,真係你嚟送貨喎!」

▼李雨陽轉行做生意賣「原味雞」

▼唔少凍肉鋪都有得賣「原味雞」

▼「原味雞」已打入內地巿場,內地有店鋪專櫃銷售

盼跟轉食出前一丁般普遍

好快,「原味雞」獲得一定口碑,開始有大型連鎖店搵佢哋合作,直到今日,家庭式凍肉鋪加埋大型超巿,「原味雞」零售點遍布全港,「大昌行全線都有(賣原味雞),以我所知 (分店)有58定59間;百佳嗰邊,比較高檔,譬如Taste、Great,或者超級廣場就會有。」

「原味雞」生意愈做愈大,依家連廣州同深圳都有專櫃銷售,李雨陽希望有朝一日,喺酒樓食「原味雞」,可以做到好似茶餐廳轉食出前一丁一樣咁普遍,「個侍應會問你,要唔要原味雞呀?要就加廿蚊。」

▼名廚周中可以話係原味雞嘅代言人