《哎呀我要飛。清邁極限飛索》
《哎呀我要飛。清邁極限飛索》
相關信用卡:

《哎呀我要飛。清邁極限飛索》

發表日期: 2016 年 03 月 01 日 更新日期: 2016 年 03 月 01 日 旅遊
作者:WING KI

年輕就是要瘋狂,琪同Joe雖然依家讀緊書又要返工,但一有時間就會離開香港,去其他地方冒險。
有啲事, 如果依家唔做,以後都唔會做。
今個月,我哋會帶你遊清邁,只要識玩,泰國都可以好好玩。



打響頭炮,第一擊。我哋會帶大家深入清邁高山低谷玩極限飛索,飛越900米山谷。真係睇到嚇到鼻哥窿無肉。一齊睇吓我哋點樣突破心理界限。



清邁最適合就係玩戶外活動,所以清邁周圍都有好多旅行社可以Tour,例如長頸族,大象表演,ATV越野車同叢林飛索等等...識玩一定玩叢林飛索,所以我哋即刻book咗個價值每人$2000泰銖嘅飛索。計返港幣都係每人$4xx姐,真係平到爛抵到笑。



首先我哋由清邁坐一個鐘車程到郊外。去到營地,聽教練們安全指導同着好安全裝備,就可以出發上山。



終於上到山啦,真係好大風呀, 不過真係好好天, 風景靚到無朋友。 但由這山望那山真係有少少驚,不過有人仲驚過我,大家睇吓佢個驚樣,真係笑死我。



大家唔好以為玩飛索係由一個地方飛去另一個地方咁就完。我哋今次玩呢個飛索可以話係全泰國最正,因為整個飛索旅程有個五十幾個平台,而且最遠路程達到900米, 係泰國之最。除咗飛越,游繩跳索同埋行獨木橋。





琪仔感受:
年輕熱血四圍闖蕩就是我大志。當我玩完飛索之後,果刻我覺得好開心,好自由。好似就算以後生活有啲咩困難,都唔會再難到我。最開心係可以用go pro拍晒成個過程而部機冇飛落街。yeah~~


Joe仔感受:
第一個感覺係,救命呀,黐線,唔係真係要玩啊嘛,我咁大個仔連跳樓機都未玩過,要我飛過成個大峽谷咁深嘅山,同叫我去死冇乜分別。
真係好好好淆底,不過同自己講,唔好驚唔好怯。原來, 踏出左第一步之後又真係唔係咁驚,仲覺得好好玩,好想玩多幾次。如果當初我因為驚而報名,依家一定會好後悔。希望下次去都有機會再玩啦。

不過清邁都仲有其他野玩~記住留意我地啦~~~

極限飛索價錢:2,000泰銖 (約$450)
【價格包含】
1、清邁城內酒店-叢林飛索往返接送;
2、自助午餐;
3、熱咖啡和茶;
4、飲用水;
5、急救保險;
6、專業英文教練;