台灣之旅~宜蘭+花蓮(一)

粒粒玲子今次只係用咗一個星期嘅時間搜集資料、換機票、訂車、訂民宿，就去咗從未去過嘅宜蘭+花蓮。

用有限嘅時間資料搜集得知，喺台北機場租車只有一間「和運租車-桃園大園站」。喺網上訂好車，4天租YARIS 1.5 價錢(共NT$8,250)，當日攞完行李一出機場就打比和運，佢地就會揸架車嚟接你去公司辦手續，去到先碌咭，又可以賺倒信用咭海外積分

由桃園到宜蘭大約須時兩個鐘車程，不過咁早到宜蘭都無特別地方去，所以去咗三芝鄉大湘路(淡水上少少)睇櫻花，可惜櫻花已經SayoLALA了~

再過少少到咗石門鄉，呢度係粒粒玲子認為台灣最北點……其實係無咩特別嘅

由石門再揸2個鐘頭車落宜蘭，粒粒玲子選擇咗喺礁溪鄉住一晚，因為可以浸溫泉呀！

星期六晚去到羅東夜市超級多人，呢檔三星卜肉好多好多好多人排隊，好在最後一日——星期二去就正常返，除卜肉好食外，佢地嘅照燒皮蛋係超好食，記住試啊！

第二日經三星鄉去武陵農場，咁啱經過各大傳媒強力推薦嘅三星何家蔥餡餅，因為三星鄉最出名就係蔥，淨係假日先有得賣，何家蔥餡餅好狠架，佢地係用一個權頭咁多嘅蔥包落個粉餅度，啲人都買得好狠，玲子前面只係排咗3個人，呢3個人一共買咗35個……每個NT$25。

三星鄉三星路八段

去武陵農場途中聽到收音機話農場塞車，呼籲公衆唔好去，唉……粒粒話咁多人去到都影唔倒相，就立即改行程由蘇花公路落花蓮，蘇花公路一路行一路都有標示到小心落石，而公路嘅另一邊係充滿sunshine嘅太平洋，形成好强烈嘅對比！

台灣自駕遊小知識：全台灣所有高速公路收費一樣係NT$40，到收費站時請選擇小車現金收費亭及預備輔幣，如果比大面額紙幣會當你買套票，你會用唔哂架！

另外某些泊車地區係需要收費，度度價錢不同，但收費唔貴(平均每個鐘約NT$10~NT$16)，你只要泊低部車，就會突然間有個人幫你PRINT張停車通知單，夠鐘就會返黎幫你填一格，到你走時去便利店付款就OK架喇~

(下期待續)