另類方法揾平機票
另類方法揾平機票
相關信用卡:

另類方法揾平機票

發表日期: 2014 年 11 月 11 日 更新日期: 2014 年 11 月 11 日 生活
作者:Keith C.

而家市面上有好多唔同嘅機票搜尋網站,個個網站都標榜自己揾到最平嘅機票,可謂花多眼亂。但其實好多人都唔知原來Google本身有一個專門揾機票的網站叫 Google Flight Search。


Google 喺2011年4月收購咗一間叫 ITA Sofware 嘅公司。呢間公司原來好有來頭,佢係眾多旅遊網站背後嘅資料供應商,亦即係大部分機票搜尋網站嘅機票價格來源都係嚟自 ITA Software(佢地部分客戶名單可以喺佢地個網站搵到,一睇就知好有分量)。當年 Google 收購 ITA Software 嘅時候就牽連大波,因為好多旅遊網站擔心收購之後 Google 會壟斷市場咁話。

無論如何,收購之後冇耐 Google 就推出咗自家 Flight Search。可能因為 Google 可以免費攞到背後所有嘅數據,所以佢有幾個功能市面上其他機票搜尋網站未見做得到。

1. 定時定刻搜尋

呢個功能最適合一早攞到假,但係有唔知應該去邊嘅你。因為你可以指定出發同回程日子,然後㩒 “展開地圖” , Google 會即時列出你指定日子所有由香港出發去世界各大機場喺嘅價錢。

輸入出發日期,然後㩒”展開地圖“。

連遍門嘅機場都有即時價錢,正!

無論係比較偏門嘅地方,好似伊朗、新西伯利亞,通通都有即時嘅價錢,唔洗逐個機場揾一次,簡直係一網打盡!

2. 指定航點搜尋

如果你未請假,但心目中有地方想去,咁呢個功能就最適合你喇。只要選定想去嘅地方,然後打開個 bar chart,揀想留記多日,Google就會話俾你知未來一年咩日子出發最平 。揀岩日子先再請假就岩曬喇!

輸入目的地,然後㩒”最低費用“

先揀好想去幾多日,然後價錢會自動即時更新,好似以上示範,出年4月嘅個兩個星期一出發最抵!

網上更有指用 Flight Search 搜尋過某一航點之後 Google 會根據呢個記錄喺搵到有你想去嘅航點嘅平機票時透過你手機嘅Google Now通知你,但而家好似仲未適用於香港出發嘅航班,所以唔好靠曬Google Now住。

傳說中嘅 Google Now 提示

但要注意 Flight Search 暫時仲未支援港幣,而係用美元顯示價錢,所以睇到價錢之後要心一心算,或者開多個 tab 打 “xx USD in HKD"先知相等港幣幾多錢。

快啲搵番張平機票又再出發啦!