「友邦歐陸嘉年華」開幕超詳盡賽後包膠！
更新日期: 2014 年 12 月 23 日
原定19號開幕既友邦歐陸嘉年華早前宣佈延期，搞到唔少買左飛既人中伏，到今日(12月23號)終於正式開幕，本人係開幕當日已經充當白老鼠狗真金白銀比錢入場，而家即刻同大家黎個詳盡賽後包膠！
嘉年華位於中環新海濱，場地唔細，但注意入口只係得一個，近住中環10號碼頭，即係摩天輪既下面，好似本人咁一開頭行錯去另一個方向(Gate 8 同Gate 11)，個度係員工入口同出口，冇得入架，要兜返轉頭，大家記得留意！
入場可以用現金/信用卡/EPS即時買飛，如果之前網上買左飛既可以係另一條隊入場。但首日現場睇倒其他人只要渣住代幣就可以入場，冇任何門票記認，入場安排好似有些少混亂，希望之後會改善番。
首日開幕人流絕對唔算多，除左影相位「3D鏡幻之旅」有明顯人龍，寫明要排30分鐘之外，基本上其他攤位遊戲唔算多人，最耐只係排10分鐘就玩倒，入去玩既朋友可以行一個圈再慢慢決定玩咩Game！現場表演暫時淨係見倒有黑人打鼓同特技演員踩高蹺遊走會場，唔算吸引！
影相位：
1.入場門口旁邊既摩天輪
2.3D鏡幻之旅 (排約30分鐘)
3.室外溜冰場
4.多塊卡通紙板
易玩荀Game推介：
呢Part係根據獎品吸引程度同玩法難易度去推介，有D攤位係易玩，但公仔一D都唔吸引，所以唔會係呢Part出玩。係玩Game之前，我亦都建議你既隊友最好集齊「力量型」、「技術型」及「眼界型」朋友，如果只係你同你伴侶去玩，就一定要咪熟下面既攻略喇！
呢個Game用豆袋打甩牙齒，目標範圍算大，不過強烈推薦「力量型」既朋友玩，因為你只要夠大力，一個豆袋可以最多扔(震?)跌3隻牙仔，在場見好多男士一中都最少跌兩隻牙仔！大隻仔最o岩玩！
將籃球射入籃，射4球，只要中一球都有minion公仔。適合「力量型」同「眼界型」朋友，現場睇10個女仔9個都唔夠力中框。如果你打開籃球，要留意距離係冇平時三分線咁遠，但係個籃既高度疑似係比平時籃框高，所以射出去既拋物線要比你平時打波既更高，或者夠大力正面撞板先可以入！
4支鏢，只要1支中啤牌都有獎，由於難度低，公仔又吸引，所以算係當日攤位人龍最長既一個，如果你平時蒲開吧玩開鏢，我諗真係冇咩難度，在場見好多女仔都好容易扔倒，但記住呢個攤位靚既公仔好快比人換哂，所以入場可以玩左呢個先！
將白波扔入桶度唔跌出黎就有獎，呢個Game o岩技術型既人，女仔玩都較著數，因為男仔玩好多時都好大力，勁易就扔左出去！最好細細力將個波扔去桶邊外圍位置，咁個波就冇咁易彈出黎！(我個女仔朋友第一次玩就扔中三粒，羸左隻超大維尼熊！)
相信好多網民都有推介呢個Game，公仔吸引又唔算難，只要個圈可以套住公仔，完全貼地就贏！適合技術型朋友，太大力一定唔work，最緊要最緊要你扔個陣要留意隔離有冇人扔緊，唔係佢個圈影響倒你就唔抵！
玩左40個代幣，最後贏左呢一堆公仔！
5大伏Game介紹
以下呢D Game難度大，現場睇幾乎冇乜人中過，大家諗清楚先好玩！
同冒險樂園扔彩虹一樣，不過1個代幣先扔得2次，變相即係5蚊次，個圈條黑邊又粗，現場睇左分鐘冇人中過！
將白波扔中木板跌入盤內就有獎，難度超高，又係冇見人中過咁濟，慳番D錢好過！
將代幣拋上碟上就有獎，但見住D人拋極都跌出個碟...又一伏Game
玩家要用白波將「全部」木頭擊中並離開檯面，擊中唔難，難在要「全部」，在場見好多人都係扔淨最尾一個，一個公仔都拎唔倒！
見倒已經笑左，比個圓形既足球你夾，夾倒既人話我知！
你見我講咁耐都冇提過機動遊戲，其實係因為開幕當日(23號)基本上係冇乜機動遊戲玩得，成個場只得摩天輪、攤位遊戲、溜冰同鬼屋玩，所以機動遊戲控暫時都係唔好去住！如果淨係想玩攤位遊戲贏公仔或者溜下冰既就可以考慮呢段時間入場，因為機動遊戲未開，人流比較少，玩都玩得舒服D!
友邦歐陸嘉年華資料
日期：12月23日至2015年2月22日
地點：中環新海濱
票價：
$125/成人（包$100遊戲代幣）
$90/小童及長者（包$70遊戲代幣）
$90/特惠門票（包$70遊戲代幣）
備註：於2015年1月5日至2月12日期間，星期一至四為特惠門票
開放時間:
12月23日 ：3:00pm-11:00pm
其餘日子：11:00am至:11:00pm
網上購票：http://tgec.ticketflap.com/zh/
P.S. 如果上網賣飛，可以用Visa、MasterCard、American Express、銀聯、PPS、支付寶過數。到時可以用建行 (亞洲) eye Visa卡買，會有5X積分。安信信貸PC Visa精明卡一單簽滿$800亦有10X現金回贈 (簽$150回$1)。