又係時候為農曆新年預熱啦!! 新年商場裝飾巡禮(下)

各位網友好！ 農曆新年仲有一個禮拜左右就到！而各大商場嘅農曆年活動已經陸續開始，為咗同大家預熱新年嘅氣氛，本欄決定向大家介紹各大商場嘅農曆新年活動，俾大家預先去感受一下新年氣氛！

 

提起新年就梗係麻雀！
 

麻雀耍樂除咗係香港人嘅集體娛樂之外，更加係農曆新年嘅一大例牌活動。旺角朗豪坊今年就以呢個深受香港人歡迎嘅活動「麻雀」作為4樓通天廣場嘅活動主題：「喜雀遊樂園」。場內以各式各樣大型麻雀作為裝飾佈置，又有多個遊戲攤位，肯定會玩得非常開心。

 

 

 

 

 

留意只要於場內消費滿港幣500元，就可以換領「喜雀遊樂園」遊戲卡一張，玩攤位遊戲「海底撈月」同「比翼雙飛」。而喺27號前，成功挑戰兩個遊戲集齊6個印章，就可以額外換領一套6個「喜雀耍樂十三么利是封」，數量有限，換完即止。

 

 

朗豪坊「喜雀遊樂園」

舉辦日期：即日起至2月12日
開放時間：11:00至23:00（年廿八至三十延長至凌晨1時，初一至初四照常營業）
舉辦地點：朗豪坊4樓通天廣場

 

 

LOONEY TUNES 幸福之旅@TKO GATEWAY
 

連接坑口站嘅TKO Gateway，今年就搵嚟華納兄弟樂一通(Looney Tunes)嘅一眾角色賀賀新年同佢哋商場開幕。賓尼兔、翠兒、達菲鴨、阿寶已經進駐商場，喺上蓋滿佈桃花嘅粉紅車站等住大家。

 

 

 

LOONEY TUNES 幸福之旅@TKO GATEWAY

舉辦日期：即日起至2月5日
開放時間：10:00至22:00
地點：領展TKO Gateway東翼及西翼 (港鐵坑口站A1出口)

 

LEGO蝙蝠俠9大造型突襲奧海城

 

 

 

 

 

來自將於2月9日上映嘅電影『LEGO蝙蝠俠英雄傳』，蝙蝠俠同小丑已經提早去到奧海城同大家賀年！ 而蝙蝠俠更加會以9個全新嘅造型同大家見面，而呢9個造型仲係全球首次亮相！ 蝙蝠俠迷絕對唔可以錯過！

 

 

 

同場更會展出由LEGO版嘅葛咸城模型同最新『LEGO蝙蝠俠英雄傳』電影產品，絕對係LEGO同蝙蝠迷必須打卡參觀嘅地方！

 

 

奧海城 x LEGO蝙蝠俠英雄傳

舉辦日期：即日 ‑ 2月16日
開放時間：12:00至21:00
舉辦地點：奧海城2期地下主題中庭

 

新年帶仔仔去黃埔玩"ANGRY雀"

 

香港從來都唔缺打卡嘅地方，不過要搵個地方有得打卡，又有得玩，仲要一家大細都去得就真係有啲難度(最好仲要掃得貨添)，今年黃埔新天地時尚坊可能係個選擇。

 

黃埔新天地今年嘅新年主題「Angry Birds 玩轉雞年」，就有3個玩樂區。大人除咗打卡、掃貨之外，小朋友又可以去嗰3個玩樂區玩餐飽，人人開心！

 

另外，只要喺黃埔新天地任何商舖消費滿$20，憑即日單一機印發票即可參加「Angry Birds玩轉雞年」3項遊戲，更有機會贏取獨一無二嘅Angry Birds肖像銅幣同其他豐富禮品。 (KidzClub會員可憑$100即日單一發票)

 

黃埔新天地 「Angry Birds 玩轉雞年」
舉辦日期：2017年1月21及22日
開放時間：13:00至19:00
舉辦地點：黃埔新天地時尚坊地庫