南山邨 新舊交融小食天堂
南山邨 新舊交融小食天堂
相關信用卡:

南山邨 新舊交融小食天堂

發表日期: 2017 年 03 月 09 日 更新日期: 2017 年 03 月 09 日 飲食
作者:Stella Yeung

 

今次帶大家去到石硤尾嘅南山邨,其實南山邨係超多30年歷史嘅公共屋邨,雖然係舊但仍然保留住一種懷舊美,好多廣告拍攝都專程去個到㗎!咁當然南山邨嘅美食都好出名啦!最出名一定係品香樓嘅超屈機凍朱古力同外面小檔嘅一蚊魷魚啦!除此之外,仲有其他好嘢,亦有開始有新食店進駐。今次我stella除咗去食下嘢之外,仲專登去感受下南山邨新舊交融嘅人情味!

 


▲依個就係南山邨最有特式嘅地標啦,有好多人都會特別嚟影相,因為有一種香港懷舊美,加上日頭同夜晚影都有唔同嘅感覺㗎!啱晒鐘意影相嘅我啦!哈哈!

 

懷舊偽文青 -  糖室

地址:石硤尾南山邨商場平台熟食亭C4號
食物:鐵鍋棉花糖吐司 $58
個人評分 :  ★★★★☆  (5星滿分)

 

▲一個十分懷舊嘅地方突然有一間非常有文青風嘅甜品店,真係一個好強烈對比,雖然地方唔大但坐得好舒服,下午嚟嘅時候都可以一邊食甜品一邊hea下!

 

▲糖室有好多特別嘅西式甜品,但最吸引到我一定係依個鐵鍋棉花糖吐司,因為外表吸引而其他甜品店好少有,棉花糖焗到啱啱好,外脆內溶口感一流!而吐司已經整成一粒粒食落去非常方便!為咗中和棉花糖嘅甜味,配料仲有水果、栗米片、雪糕!份量夠晒大足夠4個人一齊食!重點就係即叫即整嘅添!

 

人情味雪糕店 -  C+屋

地址:石硤尾南山邨南豐平台商場P20號舖
食物:榴槤雪糕、柚子雪糕 $7

個人評分 : 
榴槤雪糕 ★★★★★  (5星滿分 )
柚子雪糕 ★★★★★  (5星滿分 )


▲C+屋相信大家都唔會陌生啦,雪糕出名正靚正之外,老闆仲超級好人!除咗雪糕又平又抵食,另外一份人情味真係加唔少分數㗎!

 


▲全店雪糕一共有32種口味,你諗得出嘅味道都會有!經典口味$6一球(小甜筒$7、特大珍寶甜筒$9),特別口味就貴少少$7一球(小甜筒$8、特大珍寶甜筒$10),平到媽咪都唔認得呀!

 


▲最後我揀咗兩隻特別口味,柚子味(圖下、淺黃色)同榴槤味(圖上、深黃色)。先講雪糕份量先,佢每球嘅雪糕都起碼有半隻正常女仔手掌咁大㗎,比上次旺中嘅雪糕店大球啲!柚子味雪糕有足料嘅果肉,而佢嘅果肉真係平時沖柚子茶嘅果肉,非常有口感,誠意度滿分,而味道十分清新唔會好甜,真係好好味!另外嘅榴槤雪糕驚喜度都爆燈,因為唔會諗到7蚊可以食到咁有質素嘅榴槤雪糕,榴槤味夠濃又夠香滑,真係可以媲美上次我係澳門食嘅貓山王呀!

 


▲老板除咗賣雪糕之外,仲有賣一啲比較懷舊嘅零食!我搵到好多我小學或讀書年代嘅零食!好少地方有得賣㗎喇!


▲依個牛奶糖係我小學年代成日食嘅,記得當年都係賣緊$1.5,睇到依個零食真係所有兒時回憶都返晒嚟呀!