十大Android必裝而大家可能未裝的免費 Apps

十大Android必裝而大家可能未裝的免費 Apps

相關信用卡:

十大Android必裝而大家可能未裝的免費 Apps

發表日期: 2013 年 01 月 16 日 更新日期: 2013 年 01 月 16 日 生活

作者:經數學人

記得大約兩年前我試過喺一次朋友聚會,果時我啱啱用緊 Android 手機,同時喺 Web App 亦正享受緊好多 Google Web App (GMail、日曆、翻譯等)的好處,我當時話 Google 的東西真的 user friendly,叫佢地有機會試下。

但其時啱啱發行左部 iPhone4S —— 佢地個個都攞部 iPhone4 或者 4S 出嚟,喺度猛講裝邊個 Apps 好用,又話 iPhone 好好用,梗係唔會轉會。而我,就一個人,坐埋喺枱角邊,「獨守胸圍」……

時至今日,身邊愈來愈多人「轉會」(我一早話咗你地架啦~),但很多人都未玩熟,於是在此我決定講講我的Android 必裝 Apps 心得。

首先 WhatsApp、WeChat、Facebook、LINE 等等都唔洗我多介紹啦,果啲個個未裝機前都已經識架啦。我只會集中講一啲冇咁多人知果啲:

1. QuickPic (快圖瀏覽)

你仲用緊你跟機的媒體播放器嗎?試下呢個啦!佢可以把一些非真正相簿資料夾圖檔(如 gReader)排除不要顯示,或者把一些相簿用密碼隱藏起來。另外它的設定很豐富(可按不同方法把相片排序、改檔名、移動複製、內置圖片編輯、投影片功能等等),亦很易用。

實用:★★★★★  功能:★★★★★  易用:★★★★

2. 輸入軟體(1)CedIME (倉頡中文輸入法好用App)

在細小的熒幕不怕手指太大隻按錯鍵,它會自動更正(即打錯隔離都照入到字,我已試過哂,其他輸入 Apps 皆沒有)。亦有查碼、聯想字、常用聯常字及語音輸入等正常輸入法有的功能。但如果你用速成咁CedIME嘅幫助就唔大啦。所以,快啲學倉頡(呢度有倉頡免費學習資源及6小時課程資料)啦,真係打得快好多架,我自己一日就學識啦,這是一個甚為值得的投資!!!

實用:★★★★★  功能:★★★★  易用:★★★★★

3. 輸入軟體(2)簡易語音記事本

呢個 App 我真係想知有幾多人用緊?佢係我自己 Search 爛個 Play Store 搵番嚟架(我一邊搵一邊諗點解會冇語音輸入 App 架)!但對好似我地呢啲成日要打中文嘅博客嚟講,真係好用到爆!佢可以用廣東話語音(用口講)整句輸入,佢係用 Google 嘅語音 Engine(會用數據用量),所以都認字認得真係幾快幾準架!每次講完都有8句比你揀譯得最啱的一句,仲有學習功能,可以提高準確度。

實用:★★★★★  功能:★★★★  易用:★★★★★

4. Battery Calibration(電池較準)

電池長期叉叉用用,電池記憶記錄的準確度可能會出現少許偏差,這會令電池未差滿便錯誤地顯示為100%。這時可用這 App 較準,做法:只需叉電滿 100% 後,再多叉 5-10 分鐘,確保真正叉滿;再在 App 內按一個制便可。

(此 app 現已變為付費版)

實用:★★★★★  功能:★★★  易用:★★★★★

5. WiFi Power Saver(自動關 wifi)

一次有一友人告知我她的 Note II 嘅電好勉強夠用一日,但佢又唔睇片唔打機,主要淨係 WhatsApp。於是我攞佢部電話嚟睇睇,一睇之下,發覺佢開哂 wifi、GPS、藍芽@@。咁舊電梗唔夠用啦!!!呢三樣嘢平時唔用真係應該關左佢,特別係我地呢啲普通用量嘅人添。

呢個 App 可以讓你設定當 wifi 冇連線一定時間後幫你自動關掉它,等你唔會喺屋企出門唔記得關 wifi 。

實用:★★★★★  功能:★★★  易用:★★★★

6. GTasks(記事/工作表)

你用得 smartphone,記啲簡單嘢時,梗係記入部電話度啦。

不過,大部分電話內置的記事本 app,都沒有網上同步或備份 (Backup) 功能,你只能喺電話度輸入,方便程度爭咁啲。我呢,就用 GTasks,它能與 GMail 內的工作表 (Tasks) 進行雲端同步。

另一我覺得都幾好用既 App 係 Evernote,佢同樣可以同步至 Evernote 的網站。佢更可以記錄相,甚至係音訊,但佢個界面就比較亂,同埋佢嘅免費版會限制同步流量。

實用:★★★★★  功能:★★★★  易用:★★★★

7. gReader(Google 閱讀器)

我身邊好多人用部 smartphone 主要只係用嚟 WhatsApps,將部手機變成左流動板 MSN。真係嘥哂。

其實部智能手機最起碼可以拎黎睇下嘢,吸收下時事、知識呢啲日月精華啦。裝呢個 gReader App 啦,佢可以訂閱啲有 RSS 發佈既網站(好似我個 blog 的 RSS)。

另一頗好的閱讀 App 我覺得係 MyMetroHK。它比《都市日報》的官方 App 好用得多,可調較字體大小,可定時下載等等方便的設定。

訂閱 RSS 方法:
  輸入關鍵字,或直接輸入網址


  亦可看看 gReader 有什麼的預設 RSS 提供,但其選擇不多:

實用:★★★★  功能:★★★★  易用:★★★

8. Readability / Make Readable Later

有時睇到啲網站,有啲好文,但係好長,其實可以儲存落去呢個 App度。

佢既功能係將個網站,篩走哂啲唔相關嘅野(如廣告、其他連結等),只係剩番最主要嘅文章,增加其可閱讀性。佢仲可以將啲原本多於一頁的網站文章,串連埋變成一頁儲起。

Readability 有埋 PC 版,Firefox / Chrome 都有佢嘅 add-on。咁你喺屋企上網時,都可以將啲睇唔哂嘅長文帶出街睇!

用法:當睇到啲長文或文章的連結,「分享」至 Readability 即可。

但 Readability 官方的「分享加入」 function 太遲緩,我會用另一第三方 App "Make Readable Later" ,它幾乎能夠即時加文章至 Readability。

我個人覺得佢好用過另一類似的 App - Pocket,因為 Readability 佢會自動在你睇完一篇文章後,只要向下撥多一下就可以睇下一篇。Pocket 好處係界面比較靚。

實用:★★★★  功能:★★★★  易用:★★★★★

9. Dropsync

有時若果你由公司帶啲嘢番屋企做;又或者有啲檔案想分享比人;又或者好似我咁,會有啲教學筆記打咗想帶出街睇,你可以放喺 PC 嘅 Dropbox Folder 度,跟住設定 Dropsync 將個 Folder 同步至你的手機中。

順帶一提,Dropsync 仲有付費版,其實真係非常抵用,正價大約 $25 左右,佢係我第一個喺 Play Store 真心想買同非常滿意嘅付費 App。(之前試過 Google Play 冇設定到密碼,就比我姪女係打打下企鵝跳跳跳時,就係 Google Play 買左啲寶物啦!所以你地要記得快啲打開 Google Play 嘅設定 set 好密碼)

實用:★★★★  功能:★★★★  易用:★★★

10. Profile Scheduler(模式設置及定時模式)

有冇人試過夜晚瞓瞓下覺時,比人 WhatsApp 或者 LINE 醒左你跟住瞓唔番丫?有啲人會瞓覺時關掉手機或者靜音咗佢,但如果呢個時候有緊急電話咁點算?有啲人會關左 data,但有時第二朝又唔記得開番,就算記得晚關朝開,日日咁做都幾麻煩。依家數碼年代梗係要數碼產品幫我地自動化啦,咁用呢個 App 啦!

我設定喺晚上11時後轉做夜間模式,然後將夜間音量設定至15度入面嘅 2-3度。另外我會 set WhatsApps /LINE 的響聲設定為只「噹」一聲。咁夜晚就唔怕被人 App 醒啦。

另外,我亦設定好當我的 Google 日曆度有「教學」活動時,手機會自動去「靜心」模式。咁就又唔洗成日㩒黎㩒去,或者唔記得㩒啦。

實用:★★★★  功能:★★★★★  易用:★★★

最後送多一個都幾好用的啦:

11. BoxFun WhatsApp Kakao Chat / Smileys for WhatsApp

對於啲重症 WhatsApp 沉溺症患者,雖然 WhatsApp 最近已經更新咗好多新圖(其實啲圖可以連績輸入架,詳情可以看我之前的博文),但都唔夠用。你睇 LINE 幾多靚圖?其實你可以裝以上兩個 Apps,佢係一啲常用嘅圖檔集合。都好齊全下!

實用:★★★  功能:★★★  易用:★★★★★

廣告一則:小弟正籌備開免費 Android 應用技巧班,會分初班及進階班。詳情待公報,有意者可密切留意本博客!

【以上文章同時發表於經數樂園