劏房租貴 儲埋夠你畀首期
劏房租貴 儲埋夠你畀首期
相關信用卡:

劏房租貴 儲埋夠你畀首期

發表日期: 2017 年 02 月 26 日 更新日期: 2017 年 02 月 26 日 生活
作者:甦師父

無綫節目《有樓萬事足》入面,有對夫妻未解決土地問題就結婚,分開同各自屋企人住,希望終有一日儲夠錢能夠上車。其實要雙宿雙棲,可以租劏房吖,但原來劏房呎租貴到癲,迫近豪宅水平,慳番劏房錢儲首期買樓,可能更化算。

 

 

嗰一對年輕夫妻Henry同Hathi,收入唔高兼冇得靠父幹,淪為土地問題的直接受害者,結咗婚都要分開住,老公每星期得果一日可以去老婆屋企,親密一番;張床仲要對住外父外母果張,「好多嘢都要好細聲」。近年劏房湧現,點解2人唔租間住,做對名正言順嘅夫妻?節目冇講到點解,但一睇依家劏房呎租,答案已經呼之欲出。

 

▼Henry同Hathi結咗婚都仲要分開住,真係幾陰功(TVB片段截圖)

 

呎租媲美豪宅

 

據全港關注劏房平台舊年發表的數據,劏房平均租金係$4,095,平均面積只有132.9平方呎,計落平均呎租為$30.8,水平同荃灣愉景新城睇齊。如果有小鐵閘同消防系統嘅「高級」劏房,150平方呎叫價$5,000至$8,000,呎租為$33至$53,係美孚新邨至寶翠園嘅呎租範圍!

節目中,Henry同Hathi話有意上車,如果兩口子$4,000月租劏房,5年嚟剩係交租就要$24萬,仲未計算海鮮價嘅水電費,同埋政府有電費減免都享受唔到。如果想住好少少,$6,000租高級劏房,5年更要畀$36萬!

 

▼劏房呎價媲美唔少中產屋苑,有啲仲拍得住豪宅(非牟利組織「侷住」facebook圖片)

 

慳番租金夠畀首期

 

新一期居屋,唔計地處偏僻的離島屋苑,單位售價由$245萬至$330萬不等,計返白表首期都係$24.5萬至$33萬。唔租劏房,兩公婆分開住,捱幾年儲首期等抽居屋或買私樓上車筍盤,計番條數隨時更化算。

 

▼新一期居屋,唔計離島屋苑,九龍新界屋苑單位都係200幾至300幾萬;慳返5年劏房租金,隨時夠畀首期