出街唔使帶現金 電子錢包大比拼
出街唔使帶現金 電子錢包大比拼
相關信用卡:

出街唔使帶現金 電子錢包大比拼

發表日期: 2016 年 12 月 27 日 更新日期: 2016 年 12 月 27 日 購物
作者:積克

而家手機有電子錢包功能,出街買嘢、食嘢、甚至還錢過數畀朋友,一部手機就搞掂晒,唔記得帶銀包、冇撳錢又有乜好怕。現時市面上咁多種電子錢包功能同App,各有不同特點,今次就同大家比較下,方便各位揀啱自己用嘅一款。

 

機制不盡相同
而家主要有咩常用嘅電子錢包先,例如Android Pay、Apple Pay、八達通「好易畀」O! ePay、Tap&Go拍住賞、TNG Wallet、WeChat Pay等等。每個電子錢包嘅付款/儲值機制都唔同,主要分為:

信用卡-Android Pay、Apple Pay
可以將信用卡加入Android Pay、Apple Pay,利用手機當信用卡以非接觸式付款方式交易。

MasterCard儲值卡-Tap&Go拍住賞
建立虛擬MasterCard,可利用手機當信用卡以非接觸式付款方式交易,亦有推出實體卡可以當一般信用卡用。

八達通-八達通「好易畀」O! ePay
可以幫八達通卡增值,P2P過數畀其他O! ePay用戶。

儲值-TNG Wallet、WeChat Pay
儲值到服務戶口,再P2P過數或用嚟去實體/網上商戶畀錢。

 

門市/網上購物
話明係電子錢包,自然可以去舖頭或上網買嘢。如果係經信用卡網絡交易,認受性會大好多,始終一般商戶都接受信用卡,不論本地或海外。至於獨立電子錢包戶口,就要睇返佢哋本身同幾多舖頭合作。

 

P2P過數
呢個功能係電子錢包一個主要功能,直接喺手機過數畀其他人,唔使記低人哋嘅銀行戶口號碼,有手機號碼就可以過數。

 

銀行轉賬
除咗P2P過數畀人,有部分電子錢包仲可以將錢過落自己嘅銀行戶口,通常過數後2-5個工作天就會到賬,套現拎返現金出嚟,唔使限住要用電子錢包去買嘢用咗啲錢。而TNG Wallet仲可以去指定商戶提取現金。

 

增值方式
主要途徑係經銀行戶口過數,或者去指定商戶或門市、便利店增值。

 

購物之選-Android Pay、Apple Pay、Tap&Go拍住賞
呢個問題,要視乎你嘅用途而定,一般嚟講,如果係平時買嘢食嘢,一定係Android Pay、Apple Pay、Tap&Go拍住賞,因為佢哋都係行信用卡非接觸式交易,好多舖頭都接受。而Android Pay同Apple Pay牽涉到信用卡,自然會有唔少銀行優惠,相信大家都已經賺過。
至於網購,Tap&Go拍住賞有埋虛擬信用卡號碼、有效日期同CVC2驗證碼,可以當普通信用卡做網上交易。而其他電子錢包,就要去返接受嘅商戶先可以畀錢買嘢。

P2P過數之選-八達通「好易畀」
幾款電子錢包都有P2P過數功能,睇埋過數之後啲錢可以點用,八達通「好易畀」可以過返落八達通,亦可以過落銀行戶口,彈性大啲。如果要過數畀中國親友,可以用WeChat Pay,因為佢同一個App有香港錢包同中國錢包,如果大陸有親戚,用嚟收利是都唔錯,但要有內地銀行先可以套現。

銀行轉賬套現之選-八達通「好易畀」、WeChat Pay
八達通「好易畀」、TNG Wallet、WeChat Pay都支援銀行轉賬套現,不過TNG Wallet要收手續費,WeChat Pay每月最多轉$8,000,唔收手續費,八達通「好易畀」每月過多過$5,000,之後超過嘅數先要收錢,而且佢可以轉出轉入,比較方便。

另類功能之選-TNG Wallet
講到功能多,就要數TNG Wallet,佢可以畀的士錢、匯款去12個國家嘅銀行戶口,喺當地提取現金、交海外賬單、增值外國電話卡、兌換外幣等等。雖然除咗畀的士錢之外,唔知有幾多項係香港人經常會用到,不過用得著嘅都幾方便嘅。