冬甩迷福音！J.CO Donuts & Coffee終於登陸香港

冬甩個爸爸~冬甩個爸爸~~~J.CO Donuts & Coffee終於登陸香港啦！講起冬甩大家可能都會即刻諗起Krispy Kreme，可惜自從08年撤出香港後，喺香港想搵專賣冬甩而又好食嘅專門店似乎難上加難。好在，今個月來自印尼嘅冬甩店J.CO Donuts & Coffee終於空降香港，並預計於今個月內開業！

查實J.CO創立已經超過10年，口碑一直相當不錯，唔止喺當地有成200間分店，新加坡、菲律賓、馬來西亞等地區亦有其踪影。而店內主打的冬甩，有成22款唔同口味選擇，主要分成圓形有餡和水泡形無餡。令人印象深刻的是每款冬甩既名字都相當有趣特別，例如其中既「Tira miss u」，初時還以為是老闆的女友或初戀情人，但原來是「Tiramisu」口味，哈哈哈哈哈！另外還有「Oreology」、「Why Nut?」、「Mona Pisa」等亦非常搞笑。

店內環境亦非常舒適，燈光柔和，令人想在這裡坐上一天。

小編就率先試食咗5款口味，好在製作方式採用半炸形式，所以相對無咁油膩，食多都唔怕！（唔係藉口嚟架~）

本人係正宗Avocado迷，所以第一時間一定係試「Avocado DiCaprio」！不過咬落去忌廉味同朱古力味都偏重同偏甜，牛油果味相對較淡，但鬼叫自己鍾意食甜，一樣覺得好好味･ิω･ิ

呢款係印尼最受歡迎嘅招牌口味「Alcapone」，雖然冬甩面注入了白朱古力漿，但鋪上滿滿杏仁片後，反而可以中和番甜度，唔會覺得漏。話說香港店嘅老闆都係因為食咗呢款冬甩後，先決定將J.CO Donuts & Coffee引入香港！

呢個亦係小編最愛，鍾意crispy口感的人又點可以唔試「Crunchy Crunchy」？咬落卜卜脆的感覺實在太爽！

當初完全係為粉紅色賣相而試的「Choco Caviar Strawberry」，因為怕太甜其實當下已經後悔，但食落先知我嘅擔心係多餘！因為完全唔會太甜，濃度剛剛好~個人覺得J.CO應該係特地採用了無咁甜的朱古力&醬製作，實在太貼心~

身為一個chocoholic，試完「Crunchy Crunchy」後，都係想試多個朱古力，所以揀埋「Meisisipi」，過足我條朱古力癮，味道一樣濃而不膩，NICE！

食冬甩又怎可以沒有咖啡相伴？呢到雖然主打冬甩，但野飲一樣無得輸，呢杯mochaccino朱古力味雖然rich，但都無搶到咖啡味風頭，入口香醇，配合拉花同埋「merry christmas」嘅牌仔，感覺非常精緻~

冬甩$15/1件、$88/6件、$148/12件、$258/24件，其實價錢唔貴，非常試得過。如果想一次試多啲口味，可以選擇迷你Baby Donuts，一盒有24個，每盒只需$98，賣相同味道都好出色，最適合開心share或者買嚟做散水餅，都非常得體！

溫馨提示：聽日（星期六17/12）3pm，J&CO會免費派發100個冬甩，想試就記得差唔多時間去捕住啦！

地點:灣仔軒尼詩道55號地下1-2號鋪
開放時間:待更新
電話：6982 8282