八達通自動增值賺優惠

身為香港人，八達通應該人人都有一張，唔知大家習慣自己人手逐次增值還是已經申請咗自動增值？自動增值的確係好方便嘅，撞啱身上冇現金，都唔使走去排隊撳機攞錢增值。

好多信用卡都可以做八達通自動增值，而家八達通做緊優惠，由即日起至12月31號成功申請自動增值服務，喺2015年1月31號前自動增值一次，就可以賺超市禮券。自動增值金額$500有$100超市禮券，$250或$100就有$50超市禮券。

與此同時，滙豐信用卡亦做緊八達通自動增值優惠，而家登記，喺2015年1月31號之前自動增值一次，就可以賺額外港幣50元簽賬回贈。另外富邦信用卡做自動增值，家主可以賺5,000分，幫三位家人做埋，每個名額可以再送5,000分，總共賺20,000分。由於八達通同銀行優惠係分開做，所以向銀行申請完自動增值，然後登記晒兩邊優惠，再自動增值，應該可以食晒兩邊茶禮。

如果冇呢兩張卡，又或者想自動增值都賺多啲信用卡積分或里數，可以用交通銀行銀聯雙幣鑽石卡，佢本身12分兌Asia Miles 1里數，本地簽賬$300以上可以賺2X積分，揀自動增值$500就賺到$6=1里數。而大新英國航空白金卡本地簽賬 (包括自動增值) $6兌Avios 1里數。