全港首間churros專門店！Joō de Rolls即叫即炸玉桂條

玉桂條Churros雖然被稱為「西班牙冬甩」，但查實都係油條嘅一種，係歐洲人最愛嘅街頭小食代表，口感一樣鬆脆但就少一份油膩。偏偏喺香港一直買少見少，就算有Churros小店但都只係霧水情緣，過一排就影都唔見，喺香港要食Churros似乎都係Disneyland嘅Churros車仔檔最出名。但自從「Joō de Rolls」開業後，Churros迷的世界都被點亮了！皆因Joō de Rolls雖然主打Churros甜品，但卻破格地提供埋咸食菜式，而且所有Churros都係served hot即叫即炸，絕對新鮮，堪稱全港第一間churros專門店！

舖頭行小清新風格，光線明亮，用嘅係雲石枱，最啱文青同吃貨影相打卡。

食甜野之前，當然要食咗咸野先~呢個Churros Dog（$78）就以Churros代替面包，食落酥脆又有微微煙韌感，並滲岀濃濃麵粉香。而上面嘅wasabi醬（唔辣的放心）更是畫龍點睛，同Churros&法蘭克福腸配合得天衣無縫！連菜一齊食，感覺非常fresh。

Tiramisu Churros（$88）單是賣相已經加咗唔少分，配上香蕉和Cream cheese，絕對是魔鬼配搭。仍然溫熱嘅Churros外層香脆、內裏鬆軟，芝士味又重，連埋忌廉一齊放入口簡直似上左天堂~~另外更貼心附上朱古力醬，不過個人覺得已經夠甜了，建議可以唔洗加醬，除非你真係好嗜甜。

心思思唔知揀咩味好，揀Churro Tapas（$108）就啱晒，一次過滿足你4個願望！同樣地賣相非常吸引，4隻顏色好似4個精緻嘅cupcake咁，口味分別為士多啤梨、鹽味焦糖、抹茶和Tiramisu。士多啤梨和抹茶係直接以原味Churro塗上醬料，所以表面偏甜，之後嘅味道就比Churros做主角。鹽味焦糖就甜中帶鹹，食落最過癮，至於Tiramisu味則與剛剛點的主食Tiramisu Churros略為不同，Tiramisu Churros似乎更加好味啲~


Churros望落簡單但其實並唔容易製作，油炸不但要小心keep住鋸齒紋理，時間仲要掌握得剛剛好先可以保持鬆脆。而Joō de Rolls嘅Churros雖然等相機食先等咗好耐，但依然好鬆脆，並冇因為表面嘅忌廉而變濕變軟，最緊要係唔會油膩~水準唔止達標仲有突！以後正餐同甜品都可以喺到解決啦~