信用卡積分最佳化 點換先最抵?
信用卡積分最佳化 點換先最抵?
相關信用卡:

信用卡積分最佳化 點換先最抵?

發表日期: 2015 年 07 月 02 日 更新日期: 2015 年 07 月 02 日 生活
作者:無定向

上期就教完大家點樣用信用卡積分換到價值最高嘅頭等/ 商務客服,但係有啲卡友習慣跟團或者唔多去旅行,咁對佢地嚟講用嚟換Coupon做日常消費當錢使就會更加划算。


家庭主婦買餸卡-Citibank Rewards
叫得做買餸卡,咁當然包括超級市場啦,大路嘅百住,惠康當然包啦,吉之島呀,大昌買凍肉亦有。講緊去到超冷門嘅高級食物專賣店Oliver's The Delicatessen竟然都包!呢間喺中環太子大廈嘅超市專賣Fine Food & Wine,基本上所以類型嘅超市都包哂。

除左買餸,貴婦們唔少得會去百貨公司買下嘢,無論你係專去Harvey Nichols / 連卡佛買限量版,或者一般嘅一田、吉之島 (連十蚊店都包),以至同仔仔女女去LCX買潮物,無錯,LCX原來都叫做百貨公司,極為中國風嘅中藝、裕華國貨都有,所以呢張卡由18歲到80歲嘅人都啱用㗎!

呢張Rewards卡仲有一個必用功能,就係用嚟交電訊公司費用。由大家幫襯開既3呀,PCCW,中移動,去到睇波必備嘅Now TV或者十世都cut唔到嘅Cable TV都包,只要係電訊公司簽賬,就算買個尿袋都計架。

5X積分全年享
只有簽賬係屬於以上所講嘅「超級市場」、「百貨公司」、「電訊公司」,就可以有5X積分,而且咩登記都唔使做、積分唔會過期,最啱就係大頭蝦或者唔想煩嘅懶人!


用上面個表計算,如果係有關5X商店簽$5,000,就可以有5X積分,即係25,000分,咁就可以換到張$100 coupon。計番回贈率就2% (100/5,000),雖然唔算特別吸引,但考慮到依張卡嘅可用性都好大,例如去超市買嘢唔會定死要去某間先有額外積分,基本上咩嘢都唔使記,Citibank已經好貼心幫大家做個大包圍確保實有分,加上積分無限期,起碼唔會大頭蝦唔記得每年換分最後咩著數都攞唔到。
將「機會成本」最少化,用嚟換其他嘢。

假如大家用積分換Coupon,大家應該都係換超市多,但咁就會變咗少咗機會簽卡,因為你依家可以用換到嘅Coupon代替簽賬,變相冇咗簽卡既積分,依個就係機會成本啦。



我發現Rewards積分其實用嚟換戲飛都好著數。MCL,UA、The Sky只要10,000分就換到2D,15,000換3D,再加個迷你爆谷套餐只係5,000分。即係話25,000分可以換到兩張2D戲飛再加個爆谷餐,啱哂兩人世界。而且兩張戲飛嘅價值已經多於$100,再加埋個爆谷餐都$30-40。基本上用25,000分已經換到起碼$170嘅電影二人世界套戲。而回贈率由原先既2%升至3.4% (170/5,000)。



如果大家係百老匯院線嘅粉絲,咁就更加要儲Rewards積分,因為只要18,750分就換到兩張百老匯換票證。而一張可以換到最多$75嘅戲飛,多咗補錢就得。不過呢個優惠就一定要係Citibank上網換領,麻煩在於要等一星期先寄到張飛,唔似上面UA院線可以即場喺counter換飛,但係就可以比少啲分換啦。以呢個方法換戲飛回贈率更加大,以每張換票證值$75計,回贈率達到4% (150/3,750),係原來用25000分換$100 coupon嘅double。



而且佢係以電影票價計算,變相換3D電影其實比起用15,000換UA院線仲要平。以3D 侏羅紀世界為例,荷里活間百老匯賣緊$60,咁樣換2張3D電影比起去UA counter直接用積分換又慳左成11,250分,真係唔可以睇少複合計算嘅威力。


生日月份享8X積分
只要大家係生日嗰個月簽超級市場、百貨公司或電訊公司,嗰5X積分會加碼去到8X,變相更快換到嘢。但係點樣先可以係一個月簽到最多嘅分呢?最好既方式當然係預付電訊公司嘅費用啦,因為呢啲電話、電視Plan一簽就年幾兩年,點都要比㗎,咁不如預先比咗錢,又冇損失,又可以攞盡8X生日積分,再加上呢啲電訊服務成個合約期筆數都唔細,咁樣預付已經可以賺多咗唔少分了,用嚟換多幾張戲飛仲得!


用盡中銀信用卡積分
寫到停唔到手,一於寫埋點樣將中銀嘅信用卡積分最佳化,因為中銀既積分玩法都係分好多層次,玩得深入啲,積分又會更好使。

持卡年期愈長 賺分愈抵換
中銀嘅積分同Citibank一樣,都係一蚊簽賬賺一分,25,000分可以換到張$100 coupon,不過有一點同Citibank唔同嘅就係中銀持卡年期夠長的話,係可以用少啲積分換Coupon。持卡年期滿11年就可以用20,000分換$100 coupon,如果持卡夠21年以上更加可以用6折,即係15,000分換到。不過要hold住張卡十幾二十年,真係長情呀。

換積分必備卡-中銀信和VISA卡
好似啱啱所講,要keep住張卡成20幾年,有排等呢。所以我哋用第二招,申請中銀同信和嘅聯營卡-中銀信和VISA卡。呢張卡最大優點係可以係信和集團指定商場用150積分當$1消費,即係話有呢張卡就相當於持卡滿21年先有嘅15,000積分換$100 coupon嘅優惠。再加上信和卡係以每150積分當$1計,咁就唔使下下儲夠15,000積分先換嘢啦!

換分方法Step By Step
1. 確保你係去咗以下嘅信和集團商場



2. 喺商場嘅商店消費時,要用中銀信和VISA卡簽賬 (其他中銀卡都唔得)
3. 攞住張收據同信用卡底單去商場counter同職員講用中銀信和卡扣數
4. 兩日之後各位就會見到積分已經扣咗數,下期月結單就會見到

信和卡泊車優惠
呢張信和卡第二好用嘅優惠就係泊車優惠,只要填咗張申請表,就可以喺指定停車場有8-9折嘅優惠,啱哂各位出街揸車Shopping。
但係用呢個優惠就只可以用喺申請表填嘅嗰張八達通俾錢,如果用另一張八達通或者其他方式俾錢都係冇優惠㗎!

泊車優惠申請表 (按此)