信用卡月結單/簽賬分期邊張抵？

去電器舖買新手機、電器，大拿拿幾千幾萬蚊，有財力嘅就一次過簽，賺盡積分里數獎賞。不過好似Lady C.我呢類窮等人家，幾千蚊都勉強可以，幾萬蚊就真係要分期喇。每張信用卡都有啲除咗去指定商戶有免息分期，好多銀行都有月結單或者簽賬分期，可以成張單找數、某幾項找數、或者某一項咁找數，最啱去一啲本身冇同銀行夾做分期嘅舖頭買嘢。如果一時使大咗，爭落一大條卡數，亦都可以分期還咗佢，減少利息支出。

每間銀行嘅每月手續費 / 利息都有唔同，有啲就每月計，有啲就一次過收一筆手續費，例如COMPASS VISA可做6或12期分期，總金額由$1,000至$100,000，收一次手續費 (最低$50最高$1,000)。而唔同期數、金額亦會對每月手續費有影響。一般嚟講，都係金額愈大，手續費愈平。期數方面，最短有6個月至最長48個月不等，可以視乎個人負擔能力嚟決定。

申請時間月結單/簽賬分期都係冇積分賺嘅，不過恒生每月分期本金都可以賺Cash Dollars，而且佢手續費唔算好高，都算抵玩。而永隆嘅T&C就寫住「申請作「無限制分期」之原有簽賬及每月還款金額將不獲享現金回贈或積分獎賞，及不能計算於其他獎賞計劃或迎新禮品之簽賬要求。」吓！原有簽賬都會冇咗回贈同積分@@？我怕自己理解錯誤，打去CS問，亦證實咗原本有分嘅簽賬，一做咗分期，就會扣返啲分！好蝕啫，即係叫人唔好申請！

好喇，睇下下面個信用卡月結單/簽賬分期比較表，有啲銀行係視乎唔同客人，會唔同利率，我打去CS問，我問利率最低係幾多，一般係幾多，佢哋都俾唔到資料我。


根據以上資料，DBS、創興、富邦、渣打每月利率都比較低，如果有恒生卡，唔介意利率高少少，可以賺下Cash Dollars。如果想攤長啲還，可以揀Citibank同東亞，可以做到48期。建行 (亞洲)一單$500就可以做分期，最啱貧苦大眾。