信用卡事件簿2015

2015年即將成為過去，今年信用卡界都發生咗一啲大事，趁呢個時間，我就揀咗一啲我認為都幾重要嘅事件，同大家回顧一下。

新信用卡出場
4月嗰陣，American Express出咗張透明嘅Blue Cash信用卡，全年有1.25%現金回贈，比其他現金回贈信用卡稍為好少少，不過佢2016年就會將降至1%，唔知會唔會多返啲其他優惠呢？

本來JAL同恒生有出聯營卡，不過已經冇得申請，原來佢同AEON合作，喺9月推出AEON Card JAL World MasterCard聯營卡，呢張卡可以簽$8賺 1 日航飛行儲蓄計劃 (JAL Mileage Bank，JMB) 里數。換日本機票，JMB只要20,000里數，比起Asia Miles要30,000里數為少，不過好多卡都做到$4-$6=1里數，簽賬比率都仲係略高。


東亞Flyer World萬事達卡原本係受邀客戶先可以申請，喺2月就公開接受申請，佢全年$5=1里數，積分5年有效期，兌換里數免手續費，加上網上繳交水、電、媒等雜費都有積分，都幾受歡迎㗎。

優惠削減
今年有一啲常設優惠宣佈取消，例如富邦星期六、日網上繳費取消2X積分，交水、電、煤等日常雜費就要搵其他信用卡代替。佢嘅台灣簽賬20X積分上限亦由每年960,000分減至160,000分，最失望應該係一班「台灣是我家」嘅朋友。


匯豐喺10月宣佈由2016年1月4號起，將$1「獎賞錢」兌換15「亞洲萬里通」里數，改為10里數，喺「最紅自主獎賞」6X「’獎賞錢」之下，比率由$2.78 / 里數升上$4.17 / 里數，冇咁著數，「最紅星期五」11X「獎賞錢」會否延續似乎都唔樂觀。


另外由12月開始，匯豐白金或以上級別信用卡唔可以再喺網上繳交建行(亞洲)銀聯雙幣信用卡嘅費用，冇咗「Combo」方式賺兩邊積分，特別是一啲本來冇積分嘅交易，例如交稅，就損失咗一個重要嘅賺積分方法。

保安疑慮
10月時有傳媒發現，NFC手機加上讀卡App，可以隔空讀取部分有PayPass及payWave功能信用卡嘅資料，包括卡號、有效日期、甚至卡主姓名同交易紀錄，即時引起外界對呢類信用卡嘅保安疑慮，有銀行亦都暫停發出有非接觸式功能嘅新卡，直到系統改善完成為止。其實喺6月時，我都做過相關介紹，仲喺網上買咗啲防盜卡套嚟測試，發覺的確可以阻隔訊號，避免資料被隔空讀取，我都算係先知先覺啩？ (自High中)



好了，以上就係我心目中嘅2015年信用卡事件簿，唔知係唔係各位嘅心水，又仲有冇其他深刻事件呢？喺呢度謹祝各位新年快樂，身體健康，喺新一年繼續賺多啲信用卡獎賞。

相關連結：
美國運通出新卡 專玩現金回贈
AEON X JAL新聯營卡 儲里數有冇著數？
$5=1里數 東亞Flyer World萬事達卡開放申請
富邦改例 網上繳費2X積分不再 20150120
$25=1里數!? 匯豐即將改制
隔空偷取信用卡資料 防盜卡套可保平安？