何解二手市場冰封？

新盤成交熾熱，而二手呎價雖然錄得幾宗破頂交易，天水圍嘉湖山莊更在相隔20年後，再有過千萬成交。不過縱觀二手市場成交相當少，咩解究呢？

首先睇睇最新市況，上周中原十大屋苑成交繼續淡靜，當中熱門上車盤沙田第一城本月僅有約6宗成交，港島區海怡半島和康怡花園更加淡淨，本月至今只得2宗成交。相反，將軍澳供應多，成交亦多，長和日出康城三期緻藍天一星期內沽出1138伙，九龍東會德豐Peninsula East的50伙亦被秒殺。


其實新一輪辣招推出之後，嚇窒了不少買家，中原十大屋苑三月上旬有近200宗租務成交，比賣樓成交多近兩倍，加上第二季迎來4,000戶入伙潮，不少業主減價綁客，令很多人選擇「租住先」。另一方面，美國加息幾成事實，不少潛在買家觀望候低，更怕自己做高位接貨的傻仔。

大圍來看，少了人買樓，但總有人不怕高追，也有人趕著買樓結婚，這些需求為甚麼不流入二手市場呢？因為一手樓太便宜！Peninsula East平均折實呎價約$10,115，比九龍東藍籌麗港城平均折實呎價$10,397更便宜，而麗港城四期分別是21至25年樓齡。位於一手供應集中地的緻藍天平均折實呎價約$9,112，雖然貴絕康城站，但比起同區新都城的$12,690和東港城的$11,961依然有距離。

連明星都不斷蒲頭買新盤，難怪長和趙國雄都話加推「可能無咁抵」，怕做傻仔？如果係自住，其實價跌咗都係心情差啲，反正有層樓住，我都想排下隊。