何文田愛民邨 • 美食攻略

何文田愛民邨 • 美食攻略

相關信用卡:

何文田愛民邨 • 美食攻略

發表日期: 2016 年 11 月 17 日 更新日期: 2016 年 11 月 17 日 飲食

作者:Stella Yeung


上星期同大家分享咗港鐵黃埔站嘅美食, 今次就分享埋另外一個新開嘅港鐵車站何文田啦!何文田一直都比人感覺係豪宅區食野一定好貴,但其實係何文田有條愛民邨都有好多好有風味嘅小店㗎。只需要由何文田嘅Exit A3 忠義街出口,沿住行人天橋直行就會去到愛民邨㗎啦!

四十年正宗港式漢堡包 - 天馬快餐

地址:何文田忠孝街60號愛民廣場地下G6C舖

食物:米高漢堡餐 $35

個人評分 : ★★★★☆  (5星滿分)


▲天馬快餐開業至今足足40年,可以係一個地方40年屹立不倒當然有佢地嘅功力啦!其中招牌就係呢個超足料「米高漢堡」,入面有超厚身嘅人打牛肉、蕃茄、煎蛋、菜、洋蔥、芝士!材料新鮮,而牛肉好鬆軟好Juicy!

三十年街坊冬菇亭 - 發記粉麵

地址:何文田忠孝街60號愛民邨熟食亭地下3-4號舖

食物:四餸車仔麵  $36 、喳咋涼粉 $18

個人評分 :
四餸車仔麵  ★★★☆☆  (5星滿分)
喳咋涼粉      ★★★★☆  (5星滿分)



▲車仔麵嘅餸選擇雖然唔多,但份量真係好唔少。我擇咗雞翼、蘿蔔、豬紅、魚蛋,牛腩湯濃度適中唔會太咸,而蘿蔔同豬紅都好入味!


▲依碗喳咋涼粉真係好足料好大碗,本來怕喳咋同涼粉唔會好夾,但點知出嚟嘅效果係出其地好味!涼粉口感嫩滑加埋喳咋啲豆類顯得唔會好甜。18蚊真係好抵食呀!

多種類小食店 - 日日鮮豆漿美食店

地址:何文田忠孝街60愛民邨愛民街市W37號舖

食物:花鵰醉雞翼尖 $10/份 、 花鵰鴨舌 $10/4隻

個人評分 :
花鵰醉雞翼尖   ★★★★☆  (5星滿分)
花鵰鴨舌      ★★★★★  (5星滿分)


▲唔好比佢嘅店名誤會,除咗鮮豆漿之外,佢哋仲有好多唔同種類嘅小食,全店最特別就係花鵰醉雞翼尖同花鵰鴨舌啦,因為外面好少有得買特別係鴨舌。佢哋嘅鴨舌好肥美好大隻,而花鵰嘅酒味好香啖啖肉好好味。而花鵰醉雞翼尖份量都唔少,雞翼尖都好大隻相比一樣嘅雞翼尖大一倍㗎,花鵰嘅酒味同鴨舌一樣好香濃,如果未試過凍食雞翼尖一樣可以試下、推介!

今次分享就差唔多啦,下次見!