佐敦美食街 帶你轉彎掃三間
佐敦美食街 帶你轉彎掃三間
相關信用卡:

佐敦美食街 帶你轉彎掃三間

發表日期: 2017 年 01 月 21 日 更新日期: 2017 年 01 月 21 日 飲食
作者:Stella Yeung

 

同大家一講去佐敦食嘢的話,相信大家都會諗起澳洲牛奶。其實佐敦一帶仲有好多好正好味又有特式嘅餐廳㗎!今次我Stella就帶大家去白加士街同寧波街交界嘅三間餐廳,有西貢塔門仔嘅新鮮海膽飯、有熱辣辣勁足料嘅餡餅、仲有啱晒冬天食嘅超薑湯圓糖水,應該可以滿足晒大家唔同嘅口味啦!


 

每日直送新鮮海膽 -  塔門仔海膽燒

地址:佐敦寧波街27-31號地下B,C,D舖

食物:塔門招牌海膽炒飯 $98 , 塔門紫貝天葵 $28

個人評分 :  

塔門招牌海膽炒飯     ★★★☆☆  (5星滿分)

塔門紫貝天葵            ★★★★☆   (5星滿分)


鐘意食海膽嘅朋友見到依個海膽炒飯一定會流晒口水,佢除咗炒飯上面有大大份嘅海膽外,係炒飯裹面都佈滿海膽,每一啖每粒飲都充滿海膽,真係好滿足㗎!而佢地嘅海膽係每日係西貢嘅塔門仔新鮮直送保證新鮮。另外我仲點咗用紫貝天葵煲製而成嘅飲品,係店主自已製㗎,有清熱嘅作用, 味道酸酸甜甜有啲黑加侖子汁嘅味道, 超級好味!

 

餡餅皮薄足料 -  唯珍上海麵家

地址:佐敦白加士街125號地下

食物:北京餡餅 $12

個人評分 :  ★★★★☆  (5星滿分)


其實唯珍上海麵家有好多唔同嘅食物,但最吸引到我就係依個北京餡餅啦,因為佢地嘅餡餅係即叫即煎保證熱辣辣,而餡餅嘅嘅份量真係好大幾乎同我手掌一樣大㗎。餡餅嘅餡料就用咗韭菜豬肉餡,鐘意食韭菜嘅朋友就啱晒,因為佢嘅韭菜真係非一般嘅多,加上佢嘅外皮夠薄再帶點脆,而入面肉汁都超豐富唔會有好油嘅感覺!依家我真係好推介大家試下呀!

 

 特濃薑湯 -  佳佳甜品 

地址:佐敦寧波街29號地舖

食物:寧波薑汁湯圓 $19

個人評分 :  ★★★★★ (5星滿分)


記唔記得上次深水埗都有同大家介紹薑汁糖水,今次我終於搵到同深水埗果間同等級嘅薑汁糖水啦!佳佳甜品仲拎過2016年同2017年米芝蓮嘅推介街頭小食殊榮㗎,好勁呀!佢嘅薑汁真係超級濃郁,鐘意食薑汁嘅朋友一定會好鐘意薑汁嘅辣味,飲落去真係好暖身,嚟緊天氣開始轉凍啦,好啱冬天食!而佢嘅寧波湯圓都唔輸蝕㗎,足足有8粒咁多,湯圓好煙靭唔會黐牙,19蚊一碗真係好抵食呀!