京都地區一日小旅行:彥根

京都地區一日小旅行:彥根

相關信用卡:

京都地區一日小旅行:彥根

發表日期: 2017 年 01 月 20 日 更新日期: 2017 年 01 月 20 日 旅遊

作者:Salad Ho 沙律




去咗太多次京都,嚟去去都係去清水寺、嵐山、祇園,都有少少悶有啲新意?可以試試撥一日去附近嘅彥根玩!可能好多人對彥根都好陌生,其實佢位於擁有日本最大湖泊「琵琶湖」畔嘅滋賀縣裡面。由於位於京都東邊,所以由京都車站搭到彥根站只約45分鐘,好適合作為一日小旅行嘅地方。

(photo:http://www.welcome2japan.hk)

彥根城嘅天守閣係日本城堡中少數僅存未多加修建嘅城堡之一,係日本國寶,同姬路城、松本城、犬山城同松江城被列為「日本國寶五城」。彥根城由1604年起,用咗20年築城。石牆、三層天守、各種風格嘅屋頂、城門、庭園等都保留約400年前嘅模樣,非常珍貴!

(photo:http://girlschannel.net

「彥根貓」(ひこにゃん)係彥根建城400周年所創造嘅吉祥物。喺彥根周圍都可以發現佢嘅蹤跡。佢係「招財貓」同「井伊赤鬼軍團」嘅合體(看頭盔就知道了)。當初彥根第二代城主井伊直孝於江戶行經一座寺廟,見到一隻貓咪向佢招手,於是佢好奇行入貓咪所在嘅寺廟,呢個時候行雷,城主因為留於寺內而避過被雷劈到,於是佢將寺廟重建去感謝貓咪同寺廟,成為今日東京嘅招財貓名廟「豪德寺」,而「豪德寺」亦係井伊家嘅菩提寺,好多位城主死後都葬喺度。


「夢京橋城堡路」於古時為咗展現彥根繁榮同富裕而建立,依家成為商店街,有唔少特色土產店,街道仍保留古時建築特色,好有小江戶川越嘅感覺。呢日天氣特別凍,所以我搵咗間茶店飲杯熱抹茶取暖先。


1.政所園

政所園創業於1756年,超過八十年歷史,2間分店都位於彥根。一推門就已經聞到茶香,店員會遞上一杯熱綠茶,好窩心!


店裡出售各樣茶葉,有玉露、煎茶、玄米茶同主打嘅政所茶。


另外仲有賣各式各樣碗碟。

(photo:tabelog)
名物抹茶雪糕!於1924年由彥根店創始人用石磨盤磨出抹茶研發,可惜太凍我冇order,留待下次嚟食。

除咗於店內進食,仲可以選擇於庭園坐,環境靚好多呢。


點咗熱抹茶和菓子set,918yen。甘香微苦嘅抹茶同甜甜嘅和菓子係perfect match。彥根貓碟子好可愛!

政所園夢京橋店
地址:〒522-0064 滋賀県彦根市本町2-1-7-1/夢京橋キャッスルロード商店街
時間 : 9:30am-6pm(不定休)
網址:http://www.mandokoroen.com/

2.からんころん



からんころん專賣和式小物,有飾物、擺設、衣服、鞋、和服等等,設計同品質都非常好,呢度亦有售賣彥根貓嘅產品。

門口擺咗啲特價品,1,080yen任揀三樣貨品。

店內裝潢都以和式為主。


橫須賀刺繡的賊仔帽,刺繡好精緻。

除咗帽面,兩側都有刺繡。


店長推介嘅小和尚擺設,望住已經好治癒,裡面係豆豆質地,摸落好舒服。

彥根貓公仔(中),好可愛,係店中人氣產品,好可惜頂帽除唔到落嚟。

からんころん
地址:〒522-0064滋賀県彦根市本町1-1-31
時間:10am-7:30pm(星期四休息)


3.山上

山上係彥根地區很著名的漬物店,於滋賀地區有三間分店。出售附近地區產品製成嘅漬物,可以話係滋賀限定嘅美食!最著名嘅漬物就係用上琵琶湖湖岸種植嘅日野菜,原來係於大約500年前開始於滋賀縣日野町種植嘅傳統蔬菜,辣味和酸味剛剛好!菜葉同莖部都好適合製成漬物。而山上出售嘅日野菜漬物都係季節限定,我好好彩地試到呀!

門口店員笑容滿面地不斷遞上試食,非常殷勤,好欣賞佢咁敬業樂業。


·日野菜 姿漬 (連稅750yen)
限定售賣期間:10月至6月

堪稱近江漬物代表。用上於琵琶湖湖岸(草津)種植嘅日野菜製成,仲只採用指定農夫日野菜咋,品質控制嚴格,果然係處事認真嘅日本人!甜甜酸酸,十分爽口,味道有少少辣,似落咗少少WASABI,送飯一流!

・琵琶滿月 (連稅580yen)
限定售賣期間:12月至3月

日本人真係好浪漫,連漬物個名都可以咁有詩意,因為個名咁靚所以我買咗佢走。厚切大蘿蔔用咗柚子醋、昆布、辣椒醃製,十分惹味,甜酸中有柚子嘅清香,口感比較腍。

漬物種類甚多,可以慢慢揀同試食。

山上金亀城町店
地址:〒522-0064 滋賀県彦根市本町2丁目1番5
時間:10時am-5pm(可能因季節而變動)
網址:http://www.yamajou.co.jp/shop/


4.焼牛 たかし

買完嘢就黃昏喇,係時候食晚餐,今晚會於焼牛 たかし食近江牛燒肉!近江牛係喺滋賀縣內被培育嘅和牛,同松阪牛、神戶牛並稱為日本三大和牛之一。原來早於江戶時代,近江牛已經好少外銷,產量非常稀少,出產地滋賀縣都只可以於老店先食到優質嘅近江牛!牠們飲用琵琶湖湖水、糯米酒,食麥、米糠為主嘅飼料。

店內有吧枱同tatami位,如果食燒肉就要坐tatami呢邊呢。


近江牛のロース肉(里肌肉)¥1600

近江牛特選バラ肉(五花肉)¥950

近江牛嘅脂肪比較少,霜降非常平均,但比其他品種多少少黏性,所以牛味又濃又香,但食落口不油不膩。



每一啖牛肉都可保持一致嘅細膩口感,入口即化,好幸福呀!以日本第三的和牛嚟講,呢個價錢絕對超抵。

另外點咗炒麵(520yen),好大碟同埋好足料!

焼牛 たかし
地址:〒522-0064彦根市本町2-3-3
電話:0749-23-3644
時間:5pm-10:30pm(星期一休息)


京都去彥根交通:
由JR京都駅出發,搭乘往米原方向 JR 琵琶湖線列車,約 50 分鐘就到達彥根駅。票價: 1140 円。