京都先斗町神級蛋包飯：ザ・洋食屋キチキチ

可能有唔少人已經喺YouTube睇過ザ・洋食屋キチキチ嘅夢幻爆漿蛋包飯影片！老闆喺吧檯前切開蛋包飯，滑嫩蛋皮好似火山爆發咁一瀉而下，?間包裹住炒飯，好似藝術品一樣！呢間ザ・洋食屋キチキチ於1978年創業，因為店中招牌蛋包飯外形太令人驚豔，吸引咗唔少電視節目同雜誌採訪。

ザ・洋食屋キチキチ採用預約制，冇預約就應該難啲食到。不過好好彩店家接受網上預約，如果預約成功就會收到email確認。我留意到依家網站話Booking太Full唔接受預約住，想試試嘅朋友得閒可以再去網站睇下開返預約未。
 

餐廳位於先斗町裡面，不過位置有啲難搵，佢並唔係位於先斗町大街，而係位於小巷裡面，所以勸大家預多少少時間搵路，廢事到時遲到啦。

 

一入門口金村老闆就好熱情咁打招呼！店內裝修係Open Kicten，食客可以近距離見到金村老闆精湛廚藝同蛋包飯誕生嘅過程。吧檯只有8個坐位，唔怪得要預約先可以食到。
 

檯上Menu，最受歡迎係超おすすめ 牛タンシチュー (Super recommend！Oxtongue Stew)同ふわふわ卵の逆さオムライス (Fluffy Open Omelette over the Fried Rice)！

 

戴住紅色畫家帽嘅金村老闆開始Show Time！金村老闆先炒炒飯，會好細心咁介紹落咗咩配料，有洋蔥、蘑菇等。一開始先炒洋蔥，香到令我同同事流晒口水喇。整個炒飯動作好流暢，金村老闆駕輕就熟，一邊同食客講笑，氣氛好熱烈！

完成炒飯後會將飯放入模具，壓成整齊嘅形狀上碟。


 

然後戲肉嚟喇！開始製作蛋皮部分。金村老闆倒入3隻蛋蛋汁，細心仔細攪拌。

慢慢推動煎pan，將蛋俐落地堆成靚靚橄欖形，橄欖形蛋皮就跳上炒飯上喇。成個過程只係幾分鐘，但就睇得出金村老闆熟能生巧嘅廚藝同細心。
 

萬上眾期待！上碟喇！

 

好似食物模型咁完美。
 

落刀前金村老闆會問大家「Are you ready？」，大家即刻識做舉高相機拍低夢幻一刻。
 

切開蛋皮後金澄澄嘅嫩蛋好似花一樣綻開，蛋汁好似瀑布咁湧出，滑嫩柔軟，好誘人。
 

加上Demi-glace sauce同香草就完成喇！好似睇咗場Show一樣，未滿足食慾已經享受到完美嘅視覺盛宴。

ふわふわ卵の逆さオムライス (Fluffy Open Omelette over the Fried Rice) 2,700円

張相震唔震撼呢？睇埋條片切開蛋皮嗰刻仲震撼呀！真係太靚喇，唔太忍心用叉破壞呢個藝術品⋯⋯微甜嘅Demi-glace sauce令蛋包飯生色不少，口味比較濃但唔膩，表面細嫩內裡紮實嘅蛋皮好鬆軟，而且蛋味濃郁，加上惹味嘅炒飯，好好味！所以好快就食晒成碟嚕，好幸福呀！一個蛋包飯就可以盡享視覺味覺盛宴，加上老闆超Hyper嘅招呼，我真心推介會去京都嘅朋友試試呢個神級蛋包飯。另外我點嘅係大Size(2,700yen)，細食或想試其他菜色可以點半份size(1,450yen)。


ザ・洋食屋キチキチ
地址：京都府 京都市中京区材木町185-4
時間：5pm-9pm(不定休)
電話：075-211-1484
網址：http://kichi2.net/

地圖：