主播變老闆 賣酒要講CP值

前主播黃紫盈離開大台後，做司儀、拍旅遊節目瓣瓣掂，依家仲開埋酒窖，專賣性價比高、價錢貼地的德國酒，盡攬專業同大眾兩個酒品巿場。回顧新聞工作，當中訓練出佢凡事可以親力親為嘅能力，今日先可以同拍檔順利創業。

 

苗條為食妹

 

由做主播，到做司儀、拍攝旅遊節目，呢幾年身形仍然苗條的黃紫盈，點睇都唔似個為食妹，但佢不諱言自己一日可以「食好多餐」，喺日本讀書時，每逢見到未食過的食物，都會買嚟食。雖然有時會「中伏」，唔係吓吓食中好嘢，但食過好嘢，必定推介畀朋友，結果肥咗5公斤返香港。

鍾意飲飲食食的黃紫盈，一直想喺飲食業大展拳腳，早排同一名對酒有專業認識的拍檔，喺觀塘開咗間酒窖，叫做皇后酒窖，主要賣德國酒，主打白酒、朱古力香味紅酒、朱古力奶酒、果香味葡萄酒等。

 

▼皇后酒窖主要售賣性價比高的德國酒

 

Sell酒唔離地

 

識酒之人，當然對酒有追求，而一般人對酒亦有自己的需要，坦言對酒認識唔算深的黃紫盈會問自己：「我自己鍾意飲的酒，或專業品酒師鍾意飲的酒，係咪代表大家想要嘅呢？」所以入手性價比高的酒，都係由拍檔負責，黃紫盈則從大眾、女性及年輕人角度為客人推介美酒，盡攬專業同大眾兩個酒品巿場。

因為酒窖賣的酒唔離地，唔少價錢都係百幾二百蚊支，性價比高、價錢貼地，又方便存放，「即係你買咗返屋企，飲唔晒雪落雪櫃，隔幾日仲飲得嘅酒。」

酒窖開咗約2個月，聖誕節、新年同情人節期間，唔少平時冇飲開酒的男女都走上嚟，撞見黃紫盈，都會問佢應該買乜酒送畀另一半好。黃紫盈話，女性多喜歡舒服、入口順滑的酒，而男性則喜歡酸度較高，可襯肉類晚餐嘅酒，各位巴絲打記住喇。

 

▼離開主播工作後，黃紫盈擔當過大小活動的司儀

 

新聞工作訓練助創業

 

柳俊江、方健儀、蔡雪瑩、趙海珠等，唔少主播離開大台後都有好路數，做過主播，對黃紫盈往後事業發展嚟講，係咪一塊好好的踏腳石？

黃紫盈認為，做主播同記者畀到佢一個好好的訓練，由思考主題，到訪問邊個人，構思好後再要同攝影師夾，事後再要寫稿，將出街片段交畀剪接師，「講緊嘅係一手一腳，由零到有，出街果刻都係自己做。」就係咁，黃紫盈練成凡事可以親力親為嘅能力，今日同拍檔順利創辦酒窖，「無論創業，或擔當公司任何角色，都有好大幫助。」

 

▼酒窖內設有廚房，開工作坊，教人點樣用美酒配美食，係酒窖的業務之一