世紀妖股

世紀妖股

相關信用卡:

世紀妖股

發表日期: 2015 年 05 月 20 日 更新日期: 2015 年 05 月 20 日 生活

作者:任以風

細價股炒風非新鮮事,打開二十大升幅榜,隨便選幾隻看看日線圖,大部分一、兩星期內其實已經倍升。可能恩達(1480)炒得太熱,好多人認為業務細、純利少嘅股票急升好出奇好少有。有人叫升得癲跌得更癲的股票做「妖股」或者「老千股」,亦有各大股票專欄盤點歷年妖股,不過筆者心目中的妖股之王竟然未有人提過。


佳寧集團,七十後或之前的世代一定識,八十後應該有少少印象。佳寧集團既反映香港點石成金,短時期內致富的容易程度,也反映小散戶是最好味的大餐。

佳寧1977年成立起初做滅蟲,其後地產、飲食、酒店…咩都做,79年買盤借殼上市,聽落係一隻好正常嘅細價財技股。1980年佳寧收購金門大廈(現時的美國銀行中心),作價9億9800萬港元,幾個月後,以16億8000萬轉手,全程不含任何貸款,令佳寧由垃圾股變成股民眼中的新晉大企業。業務由香港伸延到台灣、星馬泰、菲律賓、日本甚至美國,旗下有二百多間公司。

更重要的是佳寧股價一年內由1元升到17元,背後揸莊就係潮洲怒漢金撈詹,當年佢已經過好多莊,佳寧一戰令佢成為金牌莊家。

暫時聽落無咩嘢,究竟佳寧點妖法呢?中英談判開始,股市大跌,佳寧一伙開始走佬。其實嘅業務增長全部係流料,連成名作金門大廈交易都係左手交右手。這裡就要帶出另一間公司裕民財務(大馬國有裕民銀行子公司)。佳寧買通裕民財務高層,亂批貸款,而佳寧就用錢進行偽業務擴張,擴完再借,另一方面炒股賺錢。佳寧前前後後估計起碼「借」咗五十億。

再講佢股價,當時好多股民以為係震倉,以為趁低吸納,結果停牌清盤,由於股票股東並非由要債務人(喂,點都係裕民銀行拎返先),再者錢過老千手,仲淨幾多。

最後都要交帶返佳寧核心人物陳松青最後只坐3年監。而全件案前後處理近20年,單是訟費都超過2億,仲有兩個關鍵人物死於非命。妖?呢啲先妖。

P.S.交稿今日有隻股份急跌,你怕唔怕?