世界第二好味蜜瓜包襲港!真係第二好味?
世界第二好味蜜瓜包襲港!真係第二好味?
相關信用卡:

世界第二好味蜜瓜包襲港!真係第二好味?

發表日期: 2016 年 12 月 06 日 更新日期: 2016 年 12 月 06 日 飲食
作者:emily man

來自日本金澤市嘅世界第二好味蜜瓜包「世界で2番目においしい焼きたてメロンパンアイス」,其實2年前喺涉谷開店後已經受歡迎到成日大排長龍,喺日本總共有成50多間分店,就連杜如風亦介紹過,相信好多人都喺日本食過。不過而家,想食唔洗再等到下次去日本先食到,因為「世界第2好味雪糕蜜瓜麵包香港店」已經喺香港正式開店!(同日本店名一樣水蛇春咁長XD)而且店面顏色更特地採用密瓜綠色,超sharp唔怕搵唔到!

而之所以叫蜜瓜包,查實並沒有蜜瓜成分,只係外形十足蜜瓜;味道似足菠蘿包,但就少了一份菠蘿包的甜膩。咁既然叫世界第二好味,第一好味呢?原來係教店主整蜜瓜包嘅師傅!所以就「謙虛」叫自己做第二名...而家就等我試下係咪真係有世界級咁好食!

知道蜜瓜包只得Vanilla、朱古力同抹茶味之後,我揀咗抹茶同朱古力味。麵包真係新鮮出爐,一拎上手係熱辣辣,未食已經聞到牛油味超香濃!而且外皮酥脆,咬落去脆卜卜,但又同時食到軟滑嘅雪糕,冰火交融嘅口感係幾得意。不過敗筆係雪糕,完全食唔到由日本總店新鮮送運到港嘅味道,綠茶奶味太重、偏甜,完全沒有茶澀味~

朱古力仲衰,又係好milky,覺得好似食緊雀巢雪糕...而且唔知係咪因為麵包太熱,雪糕溶得極速地快。

總體來說其實比較普通,係世界第2好味定世界第200好味真係見仁見智,而且以每個$38的售價來說其實唔抵食,或許diy用翠華菠蘿包/雞蛋仔夾雪糕食,效果亦差不多~不過如果真的想試,亦不用被超長人龍嚇親,因為店員手快keep住出貨,所以人龍亦去得快,不過禮貌和service就一定無日本店好,可能人太多做到煩躁吧...留意番麵包每天限售600個,如果遲去的話分分鐘賣晒,所以想試要及早,同埋記得帶定紙巾,因為店鋪無紙巾提供,雪糕又溶得超快,滴到周身係就唔好啦!

世界第2好味雪糕蜜瓜麵包香港店
地址:香港銅鑼灣景隆街15-27號地下1A舖 
開業日期:12月3日
營業時間:星期一至日 11am-10pm