不需靠父幹 三大風水屋邨令你風生水起

老套啲講句，一命二運三風水，跟住先係四積陰德五讀書，命同運冇得好講，但風水就唔同講法，幾多富商名人都高薪厚聘風水師父睇睇風水，希望風生水起。早前曾志偉搬入風水屋後，$2,600買馬中咗$1,600萬，又喺澳門贏埋頭馬！筆者知道，講咩豪宅風水屋太離地，所以介紹番香港3大風水屋邨。

 

風水新居超旺曾志偉

 

藝人曾志偉去年底啱啱搬入大埔新居無耐，有一次用$2,600買馬，買連贏同位置Q三串七，竟然用刀仔鋸到大樹，贏咗$1,600萬！贏咗大錢，喺演藝界地位崇高嘅佢，就買咗唔少靚酒同美食，大宴娛樂圈好友，順便慶祝吓新居入伙，賞面到場嘅好友都話新居旺曾志偉。

風水新居睇嚟仲會旺住曾志偉，事關中完馬之後，本身係馬主嘅佢，名下愛駒「品自高」1月上旬以11歲「高齡」喺澳門贏頭馬。年尾搬入新居，2017開始咗無耐就已經旺成咁，風水嘅嘢，有時唔到你唔信。

不過平民百姓，儲得起首期上車都已經好叻仔，風水屋喎，咁易住咩？但又唔使咁灰，皆因香港有3大屋邨風水奇佳，住喺度有唔少人雖然輸在起跑線，但憑食正風水加上後天努力，一樣可以升呢做富貴人家，衝出屋邨！

 

▼曾志偉贏馬$1,600萬，台上嘅名酒，價錢都濕濕啦

 

▼藝員朋友都話新居旺曾志偉

 

演藝第一：馬鞍山 恆安邨

 

 

馬鞍山恆安邨1987年先至入伙，當年屋邨仔女出身後，經多年努力，依家係時候修成正果，包括星級原居民王祖藍、容祖兒同黃翠如。有趣嘅係，原來3人小時候同住一幢公屋，係樓上樓下鄰居，黃翠如家姐仲要係王祖藍同容祖兒嘅小學同學！

佢哋今日都喺演藝界撈到風生水起，其中黃翠如同屋企人曾經住過藍田嘅木屋，不過入住恆安邨後，黃父轉做裝修判頭，自此家境開始好轉，一家人仲「大鄉里出城」咁，去酒店食自助餐同去旅行。之後黃父仲做埋建築生意，到2000年置業，買入自住嘅公屋單位，兩年後投資商廈，又賺一大筆。最近黃父仲做埋上巿公司主席，身家以十億計！

容祖兒橫掃香港樂壇獎項，係今日樂壇歌后，成就唔使講全港都知。而同佢相識28年嘅小學同學王祖藍憑搞笑形象衝出香港娛樂圈，返大陸拍攝綜藝節目，收入本已豬籠入水，近排仲做埋老闆，開工作室，簽咗自己老婆李亞男外，仲簽埋徐子珊、阮兆祥、羅霖、周汶錡等藝人，生意同演藝事業兩瓣都掂，名利雙收。

 

 

文藝第一：薄扶林 華富邨

 

 

有平民豪宅之稱、具50年歷史嘅華富邨周不時有名車出入，皆因唔少居民嘅仔女發跡喺呢條屋邨，父母住慣華富，風水又好，當然唔捨得搬啦，咁啲有錢仔女同孫仔女咪間唔中返華富邨食飯，食完就揸靚車返歸咁囉。

華富邨風水點好法？今日華富邨嘅瀑布灣雖然不復清朝新安八景中的「鼇洋飛瀑」，但每逢颱風臨打到嚟香港，唔少海魚都會聚集華富對出嘅海岸；一打完風，漁民同釣魚發燒友嚟到都會大豐收，可見背山面海嘅華富邨，風水奇佳。

除此之外，華富邨格局係「四正向」，各大廈正向東南西北；風水師話，四正向嘅風水力量較強。另外，港島嘅山頂龍脈由山頂道、加列山道，落嚟最尾嘅華富邨同毗連嘅華貴邨，食到太平山分支龍脈嘅地運！

華富邨出產嘅名人都好有才華，好似音樂界有周華健、藍奕邦，電影界則有文雋、韋家輝，選美出身則有寇鴻萍、黎燕珊同譚小環，文化界就有王貽興，時裝就有I.T老闆沈嘉偉，名人輩出。

 

 

政界第一：牛池灣 彩虹邨

 

 

風水唔單止幫助人嘅財運同文昌，事實上仲可以幫助政界人士更上一層樓，好似前立法會議員兼電台名嘴鄭經翰、財經事務及庫務局局長陳家強、社民連前主席陶君行，同埋熱血公民前首領黃洋達都係喺彩虹邨長大！

九龍有獅子山、筆架山同飛鵝山等8個龍脈，加上古時候嘅皇帝自己，9條龍脈從九龍半島衝向香港，相傳「九龍」因此得名。當中飛鵝山龍脈經斧山同牛池灣，落於彩虹，彩虹因而地運奇佳。

另外風水訣要有云：「黑氣中微露彩色，禍將退盡。白氣中帶彩色，孝服中將有喜樂事。」彩虹邨各大廈外表油成彩虹色，排除黑氣之餘，仲迎來好運，唔怪得上述政界人士都能夠縱橫政壇一時！

雖然現今香港，大家要成功比以前更需要靠父幹，但在此強調，風水命理嘅嘢只係參考，命運始終掌握喺大家手上，況且上述屋邨出身嘅名人，有邊個唔努力向上爬？