三個月又三個月 細價樓都未爆

話說，今年二月湯文亮提出「細價樓爆煲論」，預測細價樓3個月內爆煲，如果政府出手最多6個月，市場一遍嘩然，半年過去呢位出晒位嘅資深投資者上周五喺富豪飯堂擺「認錯宴」，仲叫人睇多三個月樓價會點。

首先回顧一下佢嘅理論，湯生由財務公司數量立論，話財仔由2009年300間增加半年前1200間，佢估每間財仔最少做10個四按物業，推算出本地市場有12000個四按物業，是爆煲危機。

聽落有啲粗疏，但點解會成為熱話呢？因為佢打理嘅紀惠集團前身是財務公司，現時係物業投資公司，每個月收租都4000萬，所以令支持者覺得佢知道行業「內情」，而且往績彪炳。

講到底輸就係輸，湯生同林一嗚打賭8月14日中原城市領先指數(CCL)低過136.64就當林一鳴輸，結果CCL報144.29(仲有段小插曲，認錯宴完咗之後俾何熊輝話佢唱淡入貨，湯生嬲到出律師信)。唔單止細價樓，其實整個樓市今年都係橫向，不過7月份失業率上升咗0.1%，或者係經濟回落嘅開端，湯生延期3個月會唔會中呢？

從來估金融經濟都係唔中多，比如格林斯潘由96年開始唱淡科網股，泡沫到千禧年先爆，你話佢準定唔準？偏偏佢造就出克林頓時代經濟奇蹟，仲係在位時間第二長嘅聯儲局局長。另一方面有時只要中一次你就係英雄。筆者相當欣賞嘅Paul Krugman在1996年寫了’Pop Internationalism’，貼中亞洲金融風暴，平地一聲雷，2008年拎埋諾貝爾經濟學獎。有無料其實歷史會證明，刻下成為風頭躉代表到咩？