一年一會：京都嵐山花燈節2016

2016年嵐山花燈節於12月9號至18號每日下晝5點至晚上8點半點燈，令平日悠閒嘅嵐山佈滿遊客，熱鬧非常！嵐山花燈節屬於關西三大燈會之一，差唔多每年年底都會舉辦。燈會中會用京燒等製成嘅路燈、名流派系完成的花道作品，裝飾嵯峨同嵐山長5.2公里嘅竹林小徑，另外渡月橋仲會有花燈欣賞同小食檔！保津川後嘅一片山林就會被彩燈照射，超級夢幻！燈會一年只舉行一次，所以每年都吸引到大批的遊客嚟賞景。

講返今次路線，首先會過渡月橋＝》中之島公園(小食檔)＝》插花散步路＝》商店街＝》嵐山竹林。

搭阪急到嵐山駅於嵐山站出嚟就到商店街喇，因為花燈節關係，嵐山比平時多好多遊人，超熱鬧！

渡月橋

轉眼就到咗嵐山象徵－渡月橋。佢係電影和電視劇嘅取景勝地，聽講因為龜山上皇於一個冇雲嘅夜晚，見到月亮喺橋正上方慢慢移動到另外一邊，好似「渡橋」一樣，所以就名為「渡月橋」。以渡月橋為分界，上流稱為大堰川，下流則稱桂川。渡月橋無違和地融入背後嵐山景緻，每逢紅葉、櫻花季節都會吸引好多旅客！

黃昏時候，遊客慢慢行過渡月橋去嵐山公園準備賞燈。

喺橋上遠眺美景。

中之島公園

中之島公園係嵐山公園嘅一部分，當地居民好鍾意嚟呢度消閒、睇風景。

好多人喺兩岸霸定位等點燈。

背後有幾檔小食，有燒魚、燒魷魚、章魚燒、川燒、薯條等等。

鹽燒鮎魚，有手掌咁長！條魚出自渡月橋旁邊河流，咁有特色當然要試下。一口咬開皮脆肉嫩，超Juicy。

另外我仲幫襯咗燒魷魚鬚呀，攤檔有成條燒魷魚、燒魷魚身同燒魷魚鬚。味道類似Sukiyaki醬汁，甜甜鹹鹹咁好開胃。

食完鹹嘢梗係想食返甜嘢中和下啦，好開心呀有我最愛嘅醬煮丸子！醬汁熱辣辣、甜甜地、加上少少米酒味，咁凍嘅天氣下食真係暖入心。

插花散步路

食完小食就入黑喇，中之島公園有條插花散步路，擺滿咗大大小小嘅花燈，有唔少係學生作品！喺度慢慢散步好悠閒呢。

唔少花燈作品都畫上Pokemon呢。

亦有唔少花燈畫上咗同嵐山有關嘅圖案。

晚上嵐山美景。(photo：http://kyoto-universal.jp/)

然後就向嵐山竹林進發！途經熱鬧嘅商店街，一個唔小心又跌錢買嘢喇，因為呢度好多鋪頭係嵐山特有㗎。

商店街

まゆ村

まゆ村嘅公仔都用蠶繭手工製造，絕對係心思之作。造型有動物、十二生肖、日本童話等等，圓滾滾非常可愛！店主可以免費幫你買嘅貨品插上紅色旗仔，寫上祝福。而且有本字句簿可供參考！唔識日語都唔緊要，仲有中文祝福字句可以揀，好貼心！

雞年就到喇，雞仔產品順理成章成為大熱。雞仔蠶繭公仔擺設。(1500yen)

雞仔蠶繭公仔和式屏風擺設。(3000yen)

まゆ村門口比較隱閉，認住門口呢個大燈籠，行過條小路就到まゆ村㗎喇。

まゆ村嵐山店（天龍寺前）
地址：616-8384 京都市右京区嵯峨天龍寺造路町19-5電話：075-882-4500
時間：09:00-17:00
網址：http://www.mayumura.com/index.htm

嵐山竹林

(photo：http://kyoto-photos.com/)

由野宮神社到大河內山莊所有散步路徑兩側嘅竹林都燈火通明！其他燈會可能會用上五彩繽紛嘅燈飾，但京都嵐山花燈路就與別不同，約5公里嘅路只用樸素嘅小花燈同射燈，營造出夢幻嘅大自然感覺，走在其中，不自覺就會被大自然美景感動。不過竹林小徑呢邊比較凍，記緊要著多件保暖衣物。由於唔少人終點都係竹林，提提大家最好預早少少時間，因為慕名而來嘅遊人好多，令到周圍都好擠迫，而且日本人真係好準時，講明晚上8點半熄燈就Sharp cut，如果時間預得太緊，好大可能行到一半就熄燈喇。