【有驚喜】香港首間虛擬銀行ZA Bank 開戶流程實測

【有驚喜】香港首間虛擬銀行ZA Bank 開戶流程實測

相關信用卡:

【有驚喜】香港首間虛擬銀行ZA Bank 開戶流程實測

發表日期: 2020年6月18日 更新日期: 2020年6月18日 生活虛擬銀行

作者:編輯部

相信大家都知道到,ZA Bank係香港首間「打開門」做生意嘅虛擬銀行,作為虛擬銀行一份子,ZA Bank同其他同行一樣,都以高存款利息作為賣點吸客,目前只要存款$500,000內,都可以有1%活期利率!而定期存款方面,以六個月港幣存款為例,定期年利率都可以做到2%!上次我哋講解過操作大概流程,今次就同大家實測,睇吓實物同想像有冇距離!

 

政府派1萬ZA BANK送多1000優惠

2020年6月12日前,ZA BANK會每日下午3點派出名額,拿到名額的新客戶以優惠碼「WANT11K」開戶,並於開戶14日內成功邀請2位朋友開戶,可得額外$400;再以ZA BANK戶口登記政府1萬蚊現金發放計劃,成功領取1萬蚊後,額外得$600。

 

5分鐘開戶

ZA Bank宣稱開戶只需要5分鐘,實測感覺的確非常快,而且事前準備嘅資料非常少,主要係身份證啫,以下係流程。

1. 手機驗證

初始畫面,兩隻公仔幾得意 開戶小貼士,留意非永久居民都申請得 驗證手機號碼

首先下載ZA Bank嘅App(Ios / Android),一開App就見到開戶入口,個人幾鍾意個design夠簡潔。按「立即開戶」,出現一啲開戶貼士,睇完按「繼續」,輸入手機號碼,即時會收到短訊驗證,驗證完就入埋電郵地址,呢啲基本嘢冇乜特別,都好清晰同流暢。

 

2. 驗證身份證

可選新舊智能身份證 拍攝身份證,用手拎住影 自拍一張

跟住就係同傳統銀行E Banking最大分別嘅地方,Virtual Bank點樣核實你嘅文件呢?ZA Bank只需核實你嘅身份證,過程比想像中容易,首先佢有得揀智能身份證同埋新智能身份證,坊間少見咁嘅處理,估計因為兩種身份證Layout唔同所以有得揀。跟住就係影身份證,用手揸住影就得,唔使搵Background退地,再嚟影張自拍,要嚟對番身份證個樣,影完確認身份證資料後就會幫你驗證到身份證。筆者試用經驗,影身份證1 take過,影相2 take,加埋1分鐘有找,驗證大概幾秒,感覺爽快。

 

3. 輸入個人資料

填地址,如果唔係交香港稅要補少少資料 填職業資料 聲明內容

跟住就有啲資料要填喇,包括中英文姓名、性別、出生日期、地址、職業類型、行業、職位。都係基本資料,照填就Okay,跟住對一次再確認,就會出現確認條款同私隱等聲明。

 

4. 完成開戶

設定Username同Password,見岸了 開戶成功喇! 整埋個指紋驗證先

最後步驟,設定Username同Password,就大功告成,成功開戶!筆者準備充足情況下,由開App到成功開戶,只需4分半鐘,而過程中除咗影身份證同自拍比較特別之外,其他步驟都係見慣見熟,手到拿來。開戶後筆者開埋指紋驗證,加快以後Login速度。

 

ZA Bank功能

簡潔介面 無多餘功能

定期存款,唔使落銀行開 分期貸款,除咗7x24,仲有7日冷靜期 賬戶資訊,有銀行號碼㗎,筆者遮咗咋

再試吓ZA Bank App嘅功能,其實同個介面一樣,超級簡潔,主要三個功能。頭兩個功能係佢哋開咗嘅兩個產品,定期存款同貸款,第三個功能係賬戶,裡面可以睇月結單、用轉數快,同埋有基本賬戶信息同操作。初步觀感係,幾乎冇多餘Function,第一次上手都好易搵到想要嘅嘢,呢個真係非常驚喜!

 

存款到ZA Bank

3個方法快速過數

FPS、戶口過數、綁定其他銀行戶口 綁定的話,要輸入戶口資料 綁定完可以直接在ZA Bank App過數

最後想講吓存錢入ZA Bank嘅流程(咁你贏咗開戶排名賽,都要放錢入去食息,係咪?),佢有3個選擇,第一個係轉數快FPS,將你嘅ZA Bank賬戶登記轉數快嚟過數;第二個係直接銀行過數,好簡單,即是Copy你嘅ZA Bank戶口號碼再開你其他銀行App或者e-banking過數,留意櫃員機過數暫時未支援;第三個就最方便,可以在App直接綁定其他銀行賬戶,授權ZA Bank從你其他銀行戶口直接過數,都係即時嘅,咁你就唔需要換第二個App去過數喇!不過暫時未係間間銀行都支援到,但主要嘅好多都有㗎喇。而大部分人最關心嘅存款保險問題,ZA Bank同傳統銀行一樣,合資格存款都係受存款保障計畫保障,即是話保障同風險同你去傳統銀行一樣。