​《Street Fighter V》好唔好玩?點買Game先至抵?

​《Street Fighter V》好唔好玩?點買Game先至抵?

相關信用卡:

​《Street Fighter V》好唔好玩?點買Game先至抵?

發表日期: 2016 年 02 月 20 日 更新日期: 2016 年 02 月 20 日 購物

作者:積克

唔理你係男定女,打唔打機,都應該聽過《Street Fighter》街頭霸王呢隻Game。呢隻經典格鬥Game可以話陪住好多人成長,最近出咗新一集《Street Fighter V》,機迷們又可以晚晚「席席BIRD極」喇。


今集一開始有16個角色,當然,其他角色將會陸續以DLC方式出場 (現今遊戲呃錢方式...)。可能係期望愈大,失望愈大,SFV出咗之後,機迷們評價似乎唔多好。首先遊戲模式方面,以往嘅「街機模式」 (Arcade mode) 冇咗,變成劇情模式 (Story mde),關卡得三關,每個對手1 Round定輸贏,而且電腦AI低能,就咁企喺度出拳都贏,好易打,冇Arcade mode咁多關咁有挑戰性咁耐玩,唔怪得咁多人唔滿意。

上集Arcade mode開頭同結尾都係動畫形式,今集Story mode係漫畫形式,不過啲畫風就...

要搵返少少Arcade mode連續打嘅感覺,可以試下生存模式 (Survival mode)。一條能源打到尾,每關1 Round,打完唔會回血,中間可以用分買回復或強化。佢分4級難度 (簡易、普通、困難、地獄),每用一個角色完成頭三級,就可以得到唔同配色;完成地獄級,就有一個稱號。不過要集齊一個角色嘅配色,就要打10 + 30 + 50 = 90關!16個角色就要打1,440關!仲未計地獄嘅100關,想儲一個角色真係要預個週末俾佢,堅地獄。

每場計完分就可以用分買回復或強化。

至於連線方面,網民話頭一、兩日經常連唔到線,搵唔到人對打,都幾冇癮。我試非正式對戰嗰陣係18號下晝3點同19號朝早,連線搵人到正式開打,大約用咗1分30秒至2分鐘,開Game初期可以接受,可能係PSN調整過Server。不過唔知夜晚啲人放工放學之後嘅黃金時間情況係點?而格鬥大廳開房而家只可以一對一,用咗15秒就有人入嚟,不過冇得多人輪流對戰同觀戰,希望快啲更新。

今集有新嘅V系統。首先V-Skill (中拳+中腳) 係每個角色都唔同效果嘅招式,例如Ken就係衝前,撳實會出埋腳;V-Trigger (重拳+重腳) 就係強力技,會用晒成條V-Gauge能源或者慢慢扣;V-Reversal (檔格中向前+三拳或三腳) 就係檔格中嘅反擊技。

Ken嘅V-Trigger係Heat Rush,必殺技 (波動拳、昇龍拳、旋風腿) 打中之後會著火,威力亦大啲。

出V-Reversal要睇準時機。
我用返我最愛用嘅Ken試玩 (佢個新Look認真麻麻地...),發覺操控同上集差不多,但好似鈍咗少少,招式又改咗啲,重腳旋風腿有直飛變向上升,真係有啲唔慣。而新角色之中,F.A.N.G手長腳長,攻擊範圍幾廣;NECALLI造型狂野,好型,我都有興趣操下用呢兩個。

F.A.N.G除咗手長腳長,仲識用毒,對手中招會慢慢扣血。
總括嚟講,如果個Story mode改返做好似IV咁,同埋改善下連線對打等候時間,應該會好好多。未買Game嘅唔使急住買,可以等佢改好啲先買。至於買咗嘅... Enjoy!

點買Game抵啲?
如果係PS4版,行貨實體版同下載版都係賣$398,去細Game舖買簽卡可能要收手續費,盡量俾現金會好啲。如果百貨公司有貨,亦可以用PayPass / payWave俾錢:

中銀i-card (PayPass / 網上10X積分)
獎賞價值:$15.92 (3,980分,25,000分=$100現金券)

建行(亞洲)eye卡 (payWave / 網上5X積分)
獎賞價值:$7.96 (1,990分,25,000分=$100現金回贈)

信銀國際Motion卡 (PayPass / 網上5.55%現金回贈)
獎賞價值:$21.089

如果買下載版 (PC Steam下載版就貴啲,要$465左右),就可以用網購有優惠嘅信用卡,例如:

DBS Eminent Card (6.4%現金回贈)
獎賞價值:$29.76 (當月簽賬累積滿$5,000)

中銀i-card (10X積分)
獎賞價值:$18.6 (4,650分,25,000分=$100現金券)

建行(亞洲)eye卡 (5X積分)
獎賞價值:$9.3 (2,325分,25,000分=$100現金回贈)

信銀國際Motion卡 (5.55%現金回贈)
獎賞價值:$25.8075