​【豪食自助餐】琪祖帶你食 之 馬會VIP自助餐

​【豪食自助餐】琪祖帶你食 之 馬會VIP自助餐

相關信用卡:

​【豪食自助餐】琪祖帶你食 之 馬會VIP自助餐

發表日期: 2016 年 05 月 19 日 更新日期: 2016 年 05 月 19 日 飲食

作者:AIYA_JOE


又係祖琪呢個組合帶大家覓食啦。不過今次唔係帶大家去食普通餐廳,我哋搞搞新意思,去跑馬地食VIP自助餐。無錯,係VIP,唔係人人都去得㗎。點解要去跑馬地呢,因為呢個係馬會嘅自助餐。

喺呢度食自助餐真係唔係食嘢咁簡單,因為係廂房入面個景對住馬場,真係好靚。可以見到跑馬賽道,一邊食自助餐、一邊觀賞賽事,真係幾好嘅享受。


一坐低,已經有個服務態度好好嘅侍應姐姐招呼我哋,自助餐包餐飲、啤酒、果汁任飲。侍應姐姐叫我地一定要飲菠蘿汁。我哋就梗係試吓啦,真係好好飲喎!


講到明係自助餐,呢度都好多款菜式俾大家揀,因為呢度接待嘅客人通常來自唔同嘅地方,我哋都見到有好多外國人,所以唔同地方嘅菜式都可供選擇。


亮點一 - 海鮮

色彩好鮮艷嘅海蝦同螺吸引住我同阿琪嘅眼球,食自助餐就梗係要食新鮮嘅海鮮啦,咁先值回票價㗎嘛。的確個蝦同螺都幾新鮮㗎,加埋檸檬汁真係唔錯,我都食咗好多碟。

亮點二 - 燒味

食自助餐通常都係食一碟碟嘅菜式,但係竟然畀我見到有隻掛爐鴨同叉燒,想食就可以叫師傅切俾你,真係好特別啊。

亮點三 - 自助車仔麵

我諗好少人去自助餐會諗住食車仔麵,偏偏呢度真係有得食,可以自己揀配料同配菜,整一款啱自己心水嘅車仔麵。我諗呢個係比外國客人感受下香港地道味道,大家有興趣都不妨發揮下自己嘅創意。

依家用指定恒生信用卡就可以book到呢個馬會貴賓廂房,今次我哋就係用恒生enJoy白金卡book嘅。


東亞銀行World萬事達卡都可以book到貴賓廂房,喺網上下載同填妥表格,附上信用卡嘅正面同背面影印本,用電郵或傳真方式send去馬會飲食部就OK㗎啦。
預訂一經接納後,馬會會喺兩個工作天內發出確認文件。但要留意番,預約手續確認之後就唔會接受減少訂座人數架啦。

仲有Citibank嘅Citigold客戶可以係賽馬日舉行前7至31日內,打去24小時Citigold貴賓廂房訂座專線(852) 2860 0141訂座,仲有買二送二優惠。


不過今次我哋都覺得以呢個價錢來講,係有少少貴。因為菜式都比較普通,同出面食嘅$300左右嘅自助餐比較差唔多。但呢度勝在服務真係好好,而且環境亦都好舒服,最大賣點自然係可以一邊睇賽馬一邊食自助餐,感受下做VIP嘅感覺。

是次消費:
3小時自助晚餐(連餐飲) $515 X2
總數: $1030
付款方式:
信用卡
地址: 跑馬地馬場看台4樓