隔空偷取信用卡資料 防盜卡套可保平安？
更新日期: 2015 年 06 月 22 日
相信唔少人都有MasterCard PayPass同Visa payWave非接觸式付款功能嘅信用卡，而家大部份連鎖便利店、超市、快餐店都接受呢種付款方式，方便之餘，有啲卡拍卡付款更加會有額外獎賞，賺分賺回贈啱晒。不過外國有報導話黑客可以透過特製App，加埋支援NFC嘅手機或平板電腦，行近目標人物身邊，隔空嘟走信用卡上嘅資料然後盜用，好似好危險咁。事實係點呢？市面上又有啲聲稱可以防止隔空盜取信用卡資料嘅卡套，又係咪真係Work呢？等我同大家研究下。
隔空嘟卡測試
喺Google Play下搜尋「NFC」，就可以搵到一啲可以掃描信用卡資料嘅App，我就下載咗落部有NFC嘅手機度，然後用張試下有PayPass功能嘅中銀i-card試下，睇下係咪真係嘟到。
雖然$1人民幣嗰個係紙做，用兩用都驚佢爛，但個款比較好睇。
首先開咗NFC，再開埋個App，然後將張卡放係手機背面，真係掃到張卡嘅資料，可以見到信用卡號碼，有效日期。
我將張卡放入銀包，試下掃唔掃到。
較貼近張卡嗰一面可以掃到，另一面就一時得一時唔得。
將銀包放喺後褲袋，情況都係一樣，一時得一時唔得，唔通質地厚薄有影響？
將銀包放入背囊，仍然感應到有晶片，但就出唔支援晶片錯誤，掃描唔到資料出嚟，可以算係唔成功。
經過測試，隔空偷資料係有可能做到，一個隨便下載到嘅App，都已經可以睇到主要嘅信用卡資料。如果係黑客的話，可能會有方法破解埋卡背三位數字保安密碼 (CVC)。而之前已經有人寫咗一個App出嚟，用一部手機讀取信用卡資料，然後傳俾另一部NFC手機，就可以當卡咁嘟。
雖然隔住背囊好似成功率會比較低，但唔知關唔關手機本身NFC接收能力事，如果換成接收能力強啲嘅Card Reader，成功率會唔會高啲呢？
防盜卡套測試
既然隔空偷信用卡資料係有可能發生，咁又咩方法防止呢？我見淘寶網有啲「NFC/RFID 防盜 / 屏蔽卡套」，原理就係用一層金屬物料阻隔電磁波，做到防盜效果。除咗PayPass、payWave信用卡之外，套落八達通、門匙卡、職員證都會有相同效果。
我買咗三款返嚟試，下圖最頂嗰款表面係紙咁樣，入面有層金屬物料 ($1人民幣 / 個)；中間成個都係鋁箔物料做 ($1.2人民幣 / 個)；最底嗰個同中間差不多，只係顏色唔同 ($9.9人民幣 / 3個)。雖然卡套本身好平，但運去我個集運地址要$10人民幣。
雖然$1人民幣嗰個係紙做，用兩用都驚佢爛，但個款比較好睇。
將信用卡入落卡套，手機就感應唔到，冇反應，入套再放入銀包，自然都係冇反應，但要留意如果習慣成個銀包拎去嘟八達通，咁啱隔住個套，都會Block埋。
去便利店買嘢，亦分別將信用卡入落三個卡套再拍卡俾錢，冇反應。
試下八達通，不論驗票機同入閘，三款套都可以屏蔽訊號，冇反應。
網上傳聞話錫紙都得，即管試埋佢，又真係Work喎。
基本上三款卡套都可以做到屏蔽功能，應該可以減少被隔空偷資料嘅問題。政府計劃將來會換有RFID功能嘅智能身份證，照道理呢啲套亦啱用，防止被人偷身份證資料。不過網上有人話試過遇著接收能力強啲嘅Card Reader，鋁箔未必有用，一樣擋唔住，可惜我手上只有NFC手機一部，冇呢類器材，冇辦法進一步同大家驗證。