MasterCard與Visa喺7月都出咗MasterPass同Checkout網購電子錢包服務,最近都比較積極咁推廣。咁呢兩項服務有咩特別,又有著數呢?今次就同大家研究下。
一個戶口管理所有資料 MasterCard MasterPass同Visa Checkout都可以儲存網上購物所需嘅資料,例如姓名、信用卡資料、送貨地址等等。佢可以入唔同平台嘅多張信用卡,例如MasterCard MasterPass可以入MasterCard、Visa、American Express嘅卡資料;Visa Checkout亦可以入Visa同MasterCard嘅卡資料。
喺支援MasterCard MasterPass或Visa Checkout嘅網站買嘢,就可登入電子錢包,除咗唔使再入過晒相關資料,亦可以揀已經儲存咗資料嘅信用卡俾錢,就算信用卡唔喺身邊,都可以照用,不過俾錢時仍然要入信用卡背面嘅CVV碼。
以MasterCard MasterPass為例,可以儲存多張信用卡資料同地址。
喺設定可以開「手機驗證」,每次俾錢時都會Send一個4位數字密碼去已登記手機,要入啱密碼先可以繼續確認交易。
俾錢時揀MasterPass。
如果開咗「手機驗證」,就要輸入短訊入面嘅4位數字密碼。
各有著數優惠 而家MasterCard MasterPass同Visa Checkout各自都有做優惠,例如用MasterCard MasterPass去MCL網站買兩張或以上戲飛,頭2,000個MasterCard卡成功交易,會送細爆谷一份。
至於Visa Checkout,易賞錢會員去百佳網上超市買嘢單次簽賬滿$800,即減$60,價錢仍然過$800的話,用埋Visa Checkout同Visa卡俾錢,再減$100,夾埋就減$160,差不多8折。另外去Zuji訂機票或套票,最高會有$300現金回贈。
再賺信用卡優惠 識用電子錢包,梗係用網上簽賬有額外獎賞嘅信用卡,例如中銀i-card 10X積分、建行(亞洲)eye卡5X積分、DBS Eminent Card 6% 額外現金回贈等等。
例如我用Visa Checkout去百佳網上超市買滿$878.5,用都係屬於Visa卡嘅建行(亞洲)eye卡同DBS Eminent Card簽賬,即減$160,實簽$718.5。
建行(亞洲)eye卡
優惠:網上簽賬5X積分,「
冬日獎賞計劃」簽賬滿目標金額$5,000後,每簽$100可獲額外839分
可賺獎賞:3,590分 + 5,873分 (假設已過目標金額)
25,000分=$100現金回贈
獎賞價值:
$37.852 (9,463分)
DBS Eminent Card
優惠:當月累積簽賬滿$5,000,當中網上簽賬6%額外現金回贈
可賺獎賞:$43.08 (假設已累積滿$5,000)
基本獎賞:DBS$2
獎賞價值:
$45.08統一管理減風險 不過大家可能會話,購物網站都可以儲存呢啲資料,點解要用電子錢包呢?用電子錢包Save低資料,比起喺幾個購物網站都Save低資料,資料外洩嘅風險會低啲。不過講返轉頭,電子錢包都係其中一種網上服務,都係要小心保管賬戶登入資料嘅。