​熊市如何部署資金

上月8日股災翌日寫了《股災之下的揸沽》，提到當時恒指相當接近技術熊市而國指已經是熊市。個半月後，經過新一輪跌勢，截至8月26日恒指自今年高位回落26.3%，國指連一萬關都不保，熊市走勢明顯。痛過蝕過，應該要重新評估形勢。

首先最影響香港的A股市場，阿爺似乎終於學到嘢，滬指見2,850點理論上應開始築底，開始真真正正反映市場價值。猶記得7月中一個朋友話「世界上邊個國家唔干預？阿爺出手梗係撈底！」，當然希望佢賺少少走得甩。不過不敢苟同佢高見。干預周圍有，不過無人會唔俾賣又逼人買，出埋公安查沽空，A股對資金吸引力必會大降。如果資金在國內不走，就會流向樓市，你覺得股不買不行的話出口股會受惠人仔貶值，唔怕死可以玩炒極唔完死唔斷氣而且夾死好多人的國企改革和軍工股。不過由衷講句，盡量不買A股。

至於港股，大部分股都跌到相當殘，不過千萬不要直接跳到「溝貨」，既然是熊市，唔通會一路升？個人傾向趁技術反彈鬆綁部分資金，雖然好大機會蝕入肉，但手持現金增加機動性，到熊底築成時先再入反擊。坐唔係唔好，但心理質素要夠高，而且一坐可能要坐一兩年。

至於細價股，由於跌到殘，小心供股配股合股等財技操作，亦要多睇通告，留意一些交易或操作的作價有否改變，賺少少都走咗先。

最後，其實世界除咗中港之外，仲有好多投資工具。日本美國股市有好多值得買嘅優質股，生意做得非常唔錯，另外亞太地區很多貨幣回落，買樓動輒打個九折。機會日日有！